Yezebela hta Ahtalia ngu ai shayi sha langai nga ai. Shi gaw shi kanu zawn sha grai n hkru ai. Ahtalia gaw Yuda hkawhkam jan tai ai. Shi a madu wa si mat ai hpang, shi a shadang sha gaw hkaw dung ai. Raitim, shi a kasha si mat ai hpang, Ahtalia gaw Yuda mung hpe shi nan uphkang wa ai. Shi gaw hkawhkam amyu lakung yawng hpe shamyit kau na matu shakut wa ai. Shi a kashu ni pyi n ngam hkra, shi a shara hpe sa la na masha yawng hpe sat kau ai. Dai majaw, masha shagu gaw shi hpe hkrit ma ai.

Ahtalia galaw ai lam ni gaw, n hkru n kaja ai hpe Hkinjawng Agyi Yehoiada hte, shi a madu jan Yehosheba chye ai. Shan gaw asak shoi hpa nga ai lapran, Ahtalia a kashu Yosha hpe makoi da ya ai. Shan gaw nawku htingnu hta shi hpe bau maka wa ai.

Yosha asak 7 ning hta, Yehoiada gaw hpyen latsa up ai du ni hte Lewi masha ni hpe zup hpawng shangun nna, ndai hku tsun ai: ‘Nawku htingnu a chyinghka ni hpe atsawm sin nna, kadai hpe mung hkum shang wa shangun u.’ Yehoiada gaw Yosha a baw ntsa janmau gup ya nna, Yuda mung a hkawhkam aya tang dat ai. Yuda masha ni ndai hku jahtau tsun ma ai: ‘Hkawhkam wa asak galu u ga law!’

Hkawhkam Jan Ahtalia gaw garu ngoi ai nsen hpe na yang, nawku htingnu de lawan kagat sa wa ai. Hkawhkam nnan hpe mu yang shi ndai hku marawn tsun ai: “Dai gaw gumlau ai lam re! Gumlau ai lam re!” Hpyen latsa up ai du ni gaw hkawhkam jan hpe shinggan de gang shapraw nna sat kau ai. Raitim, mungdan ntsa shi galaw wa ai n kaja ai lam ni hte seng nna gaw gara hku kun?

Yehowa langai hpe sha nawku na ngu ai ga shaka tawn na matu, mung masha ni hpe Yehoiada karum ya wa ai. Yehoiada gaw Bala a nawku htingnu ni hte gawng ngu sumla ni hpe agrawp jahten kau ai. Hkinjawng ni hte Lewi masha ni hpe nawku htingnu hta magam gun na matu  lit jaw wa ai. Dai majaw, mung masha ni gaw nawku htingnu hta bai nawku lu sai. Nawku htingnu de Karai Kasang a man hta n san n seng ai ni n shang wa na matu, sin langa ni hpe lit jahkrat da ya ai. Dai hpang, Yehoiada hte du agyi ni gaw, Yosha hpe hkawhkam htingnu de woi sa nna, hkawhkam tingnyang hta dung shangun dat ai. Yuda mung masha ni mung grai kabu ma ai. Shanhte gaw n hkru ai Ahtalia hte, Bala nawku daw jau lam kaw nna lawt wa sai. Dai majaw, Yehowa hpe sha shanhte nawku daw jau lu sai. Yehoiada marai rawng ai majaw, masha law law hpe karum ya lu wa ai lam nang mu ai kun?