Jezebeli nĩ aarĩ na mũirĩtu wetagwo Athalia, na aarĩ mwaganu o take. Aahikĩtio nĩ mũthamaki wa Juda. Rĩrĩa mũthuri wake aakuire, mũrũwe nĩwe watuĩkire mũthamaki. No rĩrĩa mũriũ ũcio aakuire, Athalia nĩ eetuire mũthamaki wa Juda. Aacokire akĩgeria kũniina famĩlĩ yothe ya mũthamaki na njĩra ya kũũraga mũndũ wothe ũngĩatuĩkire mũthamaki ithenya rĩake. Oragire nginya ciana cia mũriũ. Athalia eetigĩrĩtwo nĩ andũ othe.

Jehoiada, ũrĩa warĩ Mũthĩnjĩri-Ngai-Mũnene o hamwe na mũtumia wake Jehoshabeathu, nĩ maamenyaga atĩ Athalia nĩ kwĩhia eehagia. Nĩ meeingĩririe ũgwati-inĩ na njĩra ya kũhitha kaana getagwo Joashu ka mũriũ wa Athalia. Maakarereire nyũmba-inĩ ya Jehova.

Joashu arĩ na mĩaka mũgwanja, Jehoiada nĩ aacokanĩrĩirie Alawii na anene othe a thigari na akĩmeera ũũ: ‘Rangĩrai mĩrango yothe ya nyũmba ya Jehova na mũtigetĩkĩrie mũndũ o na ũmwe aingĩre.’ Jehoiada aacokire agĩtua Joashu Mũthamaki wa Juda na akĩmũigĩrĩra thũmbĩ mũtwe. Andũ a Juda maanĩrĩire makiuga ũũ: ‘Mũthamaki ũrotũũra!’

Athalia nĩ aaiguire inegene na agĩteng’era nyũmba-inĩ ya Jehova nĩguo akamenye nĩ kĩĩ gĩathiaga na mbere. Rĩrĩa onire mũthamaki, aanĩrĩire akiuga ũũ: “Nĩ njama ya gwĩka ũũru! Nĩ njama ya gwĩka ũũru!” Anene a thigari nĩ maamũnyitire, makĩmũruta nja, na makĩmũũraga. Kũngĩathire atĩa nĩ ũndũ wa maũndũ marĩa moru eekĩte?

Jehoiada nĩ aateithĩrĩirie andũ marĩkanĩre na Jehova atĩ mangĩamũtungatĩire o we wiki.  Jehoiada nĩ aamerire mathũkangie magongona ma Baali o hamwe na mĩhianano. Nĩ aamũrire athĩnjĩri-Ngai na Alawii marutage wĩra nyũmba-inĩ ya Ngai nĩguo andũ mahote kũhoyagĩra kuo rĩngĩ. Aaheire andũ amwe wĩra wa kũrangĩra nyũmba ya Ngai nĩguo gũtikanagĩe na mũndũ ũtarĩ mũtheru ũkũingĩra kuo. Jehoiada marĩ na anene a thigari nĩ maacokire magĩthiĩ na Joashu nyũmba ya mũthamaki nĩguo makamũtue mũthamaki. Andũ a Juda nĩ maakenire mũno. Rĩu nĩ mangĩahotire gũtungatĩra Jehova, mategũthũkio nĩ Athalia kana ũthathaiya wa Baali. Hihi nĩ wona ũrĩa ũcamba wa Jehoiada wateithirie andũ aingĩ?