Isebel okwa li e na okamonakadona haka ifanwa Atalia. Atalia okwa li ha longo owii ngaashi naanaa Isebel. Okwa li a hombolwa kohamba yaJuda. Eshi omushamane waye a fya, okamonamati kaye oka li ka hovela okupangela. Ashike eshi okamonamati ka fya, Atalia okwa li e lininga ye mwene ohamba yaJuda. Okwa li a kendabala okuhanauna po epata alishe leehamba, ta dipaa keshe oo a li ta dulu okuninga ohamba ponhele yaye, novatekulu vaye nokuli. Keshe umwe okwa li e mu tila.

Omupristeri omukulunhu Jojada nomukulukadi waye Joseba, ova li ve shii kutya Atalia ota ningi oshinima shii neenghono. Ova li va tula eemwenyo davo moshiponga mokuholeka kamwe komoutekulu vaAtalia, okahanana kedina Joas, ndele tave mu tekulile motembeli.

Eshi Joas a li e na omido heyali, Jojada okwa li a ongela omalenga aeshe nOvalevi ndele te va lombwele ta ti: ‘Keleleni pomivelo dotembeli, ndele inamu efa muye omunhu wonhumba.’ Opo nee Jojada okwa ninga Joas ohamba yaJuda ndele te mu dike oshikoroni. Ovanhu vomuJuda ova li va ingida tava ti: ‘Ohamba nai kale nomwenyo mule!’

Ohambanghainhu Atalia oya li ya uda eshi ovanhu tava ingida ndele tai tondokele kotembeli. Eshi a mona ohamba ipe, okwa ingida ta ti: ‘Ekengelelo, ekengelelo!’ Omalenga okwa li a kwata ohambanghainhu oyo ikolokoshi ndele tave i twala kokule noku i dipaa. Ndele mbela ongahelipi shi na sha noshiwana osho sha li sha nwefwa mo nai kohamba oyo?

Jojada okwa kwafela oshiwana shi ninge ehangano naJehova, she mu udanekela kutya otashi ke mu longela oye aeke. Okwa li a lombwela oshiwana shi hanaune po otembeli yaBaal nokuteyaula po oikalunga. Okwa li a nangeka po ovapristeri nOvalevi va longe  motembeli opo ovanhu va kale tava longele Jehova motembeli. Okwa li a tula po ovanangeli vopomivelo opo muha ye ovakolokoshi. Opo nee Jojada nomalenga ova twala Joas kombala ndele tave mu tula koshipangelapundi. Ovanhu vomuJuda ova li va hafa. Pomhito oyo ova li tava longele Jehova nopehe na omukolokoshi Atalia nosho yo elongelokalunga laBaal. Mbela ou wete nghee ouladi waJojada wa li wa kwafela ovanhu vahapu?