មេរៀនទី៥៣
ភាពក្លាហានរបស់យេហូយ៉ាដា
យេសិបិលមានកូនស្រីម្នាក់ឈ្មោះអាថាលៀ។ នាងប្រព្រឹត្តអំពើអាក្រក់ដូចម្ដាយនាង។ អាថាលៀបានរៀបការជាមួយនឹងស្ដេចស្រុកយូដា។ ពេលប្ដីស្លាប់ កូនប្រុសរបស់នាងក៏ធ្វើជាស្ដេច។ ប៉ុន្តែ ក្រោយពីកូនប្រុសនាងស្លាប់ អាថាលៀក៏តាំងខ្លួនជាអ្នកគ្រប់គ្រងស្រុកយូដា។ បន្ទាប់មក នាងព្យាយាមតាមសម្លាប់ពូជពង្សស្ដេចទាំងអស់ គឺអ្នកណាក៏ដោយដែលមានសិទ្ធិធ្វើជាស្ដេចជំនួសនាង សូម្បីតែចៅៗបង្កើតរបស់នាង។ មនុស្សគ្រប់គ្នាភ័យខ្លាចនាងខ្លាំងណាស់។
សម្ដេចសង្ឃយេហូយ៉ាដា និងប្រពន្ធរបស់គាត់យេហូសេបាដឹងថា ទង្វើរបស់អាថាលៀគឺអាក្រក់ក្រៃលែង។ ដូច្នេះ ពួកគាត់បានប្រថុយជីវិតដើម្បីលាក់ទារកម្នាក់ឈ្មោះយេហូអាស ដែលត្រូវជាចៅរបស់អាថាលៀ។ ពួកគាត់ចិញ្ចឹមយេហូអាសនៅក្នុងវិហារ។
ពេលយេហូអាសមានអាយុ៧ឆ្នាំ យេហូយ៉ាដាបានប្រមូលពួកមេបណ្ដាជនទាំងអស់ ព្រមទាំងពួកលេវីឲ្យមកជួបជុំគ្នា ហើយប្រាប់ថា៖ ‹ចូរយាមគ្រប់ទ្វារទាំងអស់ក្នុងវិហារ កុំឲ្យអ្នកណាម្នាក់ចូលឲ្យសោះ›។ បន្ទាប់មក យេហូយ៉ាដាបានតែងតាំងយេហូអាសឲ្យធ្វើជាស្ដេចស្រុកយូដា ដោយបំពាក់មកុដលើក្បាលគាត់។ បណ្ដាជនយូដានាំគ្នាស្រែកឡើងថា៖ «សូមឲ្យស្ដេចមានអាយុវែង!»។
មហាក្សត្រីអាថាលៀឮសំឡេងបណ្ដាជនស្រែកហ៊ោ នាងក៏ប្រញាប់ចេញទៅវិហារ។ ពេលឃើញស្ដេចថ្មី នាងស្រែកឡើងថា៖ «នេះជាការក្បត់! នេះជាការក្បត់ហើយ!»។ ប៉ុន្តែ ពួកមេបណ្ដាជនបានចាប់ស្ត្រីដ៏កំណាចនេះ យកទៅសម្លាប់នៅខាងក្រៅ។ ចុះយ៉ាងណាឥទ្ធិពលអាក្រក់ដែលនាងបានធ្វើមកលើបណ្ដាជន?
យេហូយ៉ាដាបានជួយបណ្ដាជនឲ្យចុះកិច្ចព្រមព្រៀងជាមួយនឹងព្រះយេហូវ៉ា ដោយសន្យាថាពួកគេនឹងគោរពប្រណិប័តន៍តែលោកប៉ុណ្ណោះ។ យេហូយ៉ាដាបានប្រាប់ពួកគេឲ្យកាប់រលំវិហាររបស់ព្រះបាល ហើយបំផ្លាញរូបសំណាកផ្សេងៗ។ រួចមក គាត់បានតែងតាំងពួកលេវីនិងពួកសង្ឃឲ្យបម្រើក្នុងវិហារ ដើម្បីបណ្ដាជនអាចគោរពប្រណិប័តន៍ព្រះនៅទីនោះម្ដងទៀត។ បន្ទាប់មក គាត់បានរៀបចំឲ្យមានអ្នកយាមនៅខ្លោងទ្វារវិហារ ដើម្បីកុំឲ្យមនុស្សមិនស្អាតបរិសុទ្ធចូល។ រួចយេហូយ៉ាដានិងពួកមេបណ្ដាជនបាននាំយេហូអាសមកវិមាន ហើយឲ្យអង្គុយលើបល្ល័ង្ក។ បណ្ដាជនយូដាគ្រប់រូបត្រេកអរខ្លាំងណាស់។ នៅទីបំផុត ពួកគេបានរួចផុតពីឥទ្ធិពលដ៏អាក្រក់របស់ស្ត្រីកំណាចអាថាលៀ និងពីការគោរពបូជាព្រះបាល។ ឥឡូវ ពួកគេអាចបម្រើព្រះយេហូវ៉ាបាន។ តើអ្នកគិតថាភាពក្លាហានរបស់យេហូយ៉ាដាបានជួយមនុស្សជាច្រើនឬទេ?
«កុំខ្លាចអស់អ្នកដែលអាចសម្លាប់រូបកាយ តែមិនអាចសម្លាប់ជីវិតដែលអ្នកនឹងទទួលនៅអនាគតនោះឡើយ។ តែត្រូវខ្លាចលោកដែលអាចធ្វើឲ្យអ្នកវិនាសទៅក្នុងកេហេណាវិញ»។—ម៉ាថាយ ១០:២៨
