Jezabele ua kexile ni mona a muixanene Ataliia, uexile muthu uaiibha kála manh’â. Ataliia ua kazalele ni sobha ia Judá. Kioso muadi uê kiafu, o mon’ê ua mateka kutumina kala sobha. Maji kioso mon’ê kiafu, Ataliia ua di bhange sobha mu ixi ia Judá sé ku mu sola. Mu ku suluka, muéne ua mesenene ku buikisa o mbutu kueji tunda o jisobha, ua kexile mu jibha muthu uoso-uoso ua mesenene kutumina bhu kididi kiê, katé muene ni alaul’ê. Mundu uoso ua kexile mu kala ni uôma ua muéne.

O Mukunji ua Dikota Joiada, ni muhatu uê Jozabate, ejidile kuila Ataliia ua kexile mu bhanga ima iaiibha. Ene a tele o mienhu iâ mu iluezu, mu kusueka o mulaula ua Ataliia, a muixanene Jouaji. Ene a mu sasela mu tembulu.

Kioso Jouaji kia kexile ni sambuadi dia mivu, Joiada uongeka o makota a miji, ni Jilevita iu ua a tangela uixi: ‘Langidilenu o mabhitu a tembulu, kanenu kuehela muthu uoso-uoso kubokona-mu.’ Mu kusuluka Joiada ua te Jouaji kala sobha mu Judá , iú ua mu zuika o kitundu kia ungana ku mutué. Mundu uoso anga u dikola uixi: ‘Sobha a tane-ku!’

O Nvuale Ataliia uevu o jibuia joso, iú ua lenge katé mu tembulu. Kioso muéne kia mono o sobha ia ubhe, ua dikola: ‘Iú ufé! Iú ufé!’ O makota a miji a mu katula mu tembulu, ia a muambata bhu kanga, anga a mu jibha. Maji o ifua iaiibha ia xisa ku mundu uoso?

Joiada ua kuatekesa o mundu kuta kikutu ni Jihova, mu kienhiki ene a kanena kubheza ngó Muene. Joiada ua budile o tembulu iâ, ia Bahale, ni kubula o iteka ioso mu jimbandu. Muéne ua solo o akunji ni Jilevita, phala kukalakala mu tembulu ni ku kuatekesa o mundu uoso kubheza-mu dingi. Muéne ua solo alangidi a mielu, n’a lange o tembulu phala ki mu bokone muthu ua xidi. Mu ku suluka, Joiada ni makota a miji ambata Jouaji katé mu mbonge, iá a mu tula ku kiandu kia ungana. O mundu uoso ua Judá, ua sangulukile kiavulu. Mu kithangana kienhokio, ene eji bheza kiambote Jihova sé o nvuale iaiibha Ataliia, ni ubhezelu ua Bahale. O kuila u tena kuxinganeka kiebhi o kusuína kua Joiada kua kuatekesa athu avulu?