Jezibɛl bin gɛt wan galpikin we nem Atalaya. I bin wikɛd jɔs lɛk in mama. Atalaya bin mared to di kiŋ na Juda. We in man day, in bɔypikin bigin fɔ rul. Bɔt we in bɔypikin day, Atalaya mek insɛf kwin na Juda. Dɔn i tray fɔ kil ɔlman we gɛt rayt fɔ rul na di kiŋ in famili ɛn ɛnibɔdi we go want fɔ bi rula, ivin in yon granpikin dɛn. Ɔlman bin de fred am.

Ay Prist Jɛoayda ɛn in wɛf, we nem Jɛoshiba, bin no se wetin Atalaya de du rili bad. Dɛn put dɛn layf pan denja fɔ ayd wan pan Atalaya in granpikin dɛn, we nem Jɛoash. Dɛn mɛn am na di tɛmpul.

We Jɛoash ol sɛvin ia, Jɛoayda gɛda ɔl di lida dɛn ɛn di Livayt dɛn ɛn tɛl dɛn se: ‘Una gayd di tɛmpul in domɔt dɛn, ɛn una nɔ alaw ɛnibɔdi fɔ kam insay.’ Dɔn Jɛoayda mek Jɛoash bi di kiŋ na Juda, ɛn i put krawn na in ed. Di pipul dɛn na Juda ala se: ‘Mek di kiŋ gɛt lɔng layf!’

Kwin Atalaya yɛri di nɔys we di pipul dɛn bin de mek, so i rɔn go na di tɛmpul. We i si di nyu kiŋ, i ala lawd wan se: “Dɛn wan ovatro mi! Dɛn wan ovatro mi!” Di lida dɛn bin kech di wikɛd kwin, dɛn kɛr am go, ɛn go kil am. Bɔt wetin bin apin to di bad tin dɛn we i bin dɔn de mek pipul dɛn du?

Jɛoayda bin ɛp di pipul dɛn fɔ mek agrimɛnt wit Jiova fɔ prɔmis am se na In nɔmɔ dɛn go wɔship. Jɛoayda mek dɛn brok Beal in tɛmpul ɛn pwɛl di lay lay gɔd dɛn kpatakpata. I pik prist ɛn Livayt dɛn fɔ go wok na di tɛmpul, so dat di pipul dɛn go go wɔship Jiova de  bak. I pik getman dɛn fɔ gayd di tɛmpul so dat ɛnibɔdi we nɔ klin nɔ go ɛnta de. Dɔn Jɛoayda ɛn di lida dɛn bin kɛr Jɛoash go na di pales ɛn put am na di tron. Di pipul dɛn na Juda bin gladi. Dɛn ebul fɔ wɔship Jiova fri wan naw bikɔs wikɛd Atalaya ɛn Beal wɔship nɔ de igen. Yu si aw di maynd we Jɛoayda bin gɛt ɛp bɔku pipul dɛn?