Chɛsibɛɛ ndoo nɔ chuaa diolaŋ aa Atalaya. Ndu bɛɛ dɛnɛ wɔɔŋndo pila ndoo nɔ ni maa kala ndɔ. Lanɔɔ masaa o lɛŋnde Chuda leŋ niŋ Atalaya wa ni. Mɛɛ pɔnɔ ndɔ vi, mi po ndɔɔ miiŋgu o masaleŋ choo. Kɛ mɛɛ po ndɔɔ bɛɛ vi, mi Atalaya pila miiŋgu o masaleŋ choo Chuda. Nduyɛ wana o wana fula o yuŋgu lemasaa choo, mbo nɔ dioo le waa masaa, mbo kindiŋ le nda diyɔɔ yɔŋii nda faŋa ndu o masaleŋ choo. Nduyɛ po ndɔ mamaa bɛɛ mbo dii ndu. Mi siooŋnde bii wana o wana fee le ndu.

Mi Masa Wanaa Soliaa Lasalaa Chɛhowada, nda laa ndɔ Chɛhosiɛba, sina kɛsɛ maa nyɛ Atalaya wa tosaa wo niŋ kposoŋ te. Ma luei yoomula ndalaŋ o kpundɔɔ niŋ, ma viaŋ po mama Atalaya wo opilɛ diolaŋ aa Chowasi. O wa o pɔmbɔ, okoŋ ma manda ndu o chiɛi Mɛlɛkaa niŋ.

Mɛɛ Chowasi fuuluu wɔsilaŋ la ŋɔmmɛu, mi Chɛhowada chuuŋgiaa laŋgbaa kalla a Livaiya kpou, mbo dimul nda aa: ‘La manda diola chiɛi Mɛlɛkaa, nduyɛ la chɛl mi wana o wana luɛi le.’ Okoŋ mi Chɛhowada siiŋguu Chowasi masaa le Chuda, mbo wou ndu mɔsil lemasaa. Mi waŋnda Chuda deŋi choo choo aa: ‘Maa masaa viou naa choo fɔ!’

Mi wɛɛŋndo masaa Atalaya tuɛi bɔɔluu bɛndu waŋnda wa wo, nduyɛ mbo kua chɔ chɔ o chiɛi Mɛlɛkaa. Mɛɛ o che Masa sɛnɛiyo, mbo mɛli yeelaŋ choo choo kpeleŋ aa: ‘A yii ya defoo fɔ! A yii ya defoo fɔ!’ Mi laŋgbaa kalla bii masa dɛnɛ wɔɔŋndo hoo ma soli ndu o bɛɛ, ma kɔ dii ndu. Le wɔsiŋ bɔɔbɔɔ, masaa Atalaya wa waŋnda nyindɔɔ le kaa ndɔ wɔɔŋndo tolɔɔ kɔɔli. Kɛ yɛɛnɛ ndoo yɔŋnuŋ yɛ o piɔm ndɔɔ kɔɔli?

Mi Chɛhowada mala waŋnda Isɔluɛi le ma yii kpemaa a Chɛhowa. Nduyɛ ma chua buŋgɛi maa ndu kinɛi nda cho piɛi ni. Okoŋ, mi Chɛhowada tosa mi  waŋnda pial maaŋ Baal lo, nduyɛ ma pesi pesi piɔmaa wa leniŋ nda. Mbo yulu wanaa soliaa lasalaa a Livaiya isu, le wallo tosaa o chiɛi Mɛlɛkaa niŋ, le halikpeŋ mi waŋnda miiŋgu vɛlɛ Mɛlɛka piɛiyo loŋ. Mbo kɛsi wanaa mɛŋgɛlaa o diola chiɛi Mɛlɛkaa, le halikpeŋ wana o wana cho wana nɔɔlɛi luei leniŋ te. Okoŋ, mi Chɛhowada a laŋgbaa kalla chua Chowasi, ma kua a ndu o chiɛi lemasaa, ma kɛsi ndu o kpeŋgbei lemasaa niŋ. Mi waŋnda Chuda kpou duaunuŋ nyaale. O mɛɛlulaŋ kpɔŋ, masa dɛnɛ wɔɔŋndo hoo Atalaya ve lɛ le, nduyɛ waŋnda ve lɛ Baal sooluu le. Ndaa tiu niŋ ba ma piɛi Chɛhowa. A che pa mɛɛ kɔl simulaa Chɛhowada chɔmndo mala wanaa bɔɔbɔɔ yɛ?