Ul itzʼji jun tal Jezabel aju Atalía tbʼi ex ax ikx nya bʼaʼntoq ik tzeʼn te. Kubʼ mojeʼ Atalía tukʼil aj kawil te Judá. Tej tkyim tchmil, atl tal ok te aj kawil. Ex tej tkyim tal, atl Atalía ok te aj kawil te Judá. Tuʼn miʼn tel qʼiʼn kawbʼil te, ok tilil tuʼn tuʼn tkubʼ tbʼyoʼn qe tkʼwaʼl aj kawil ex kykyaqil qeju jakutoq che ok te aj kawil. ¡Axpe ikx e kubʼ tbʼyoʼn qe tal tchman! Tuʼntzunju, kykyaqil xjal in che tzaj xobʼtoq te.

Aju tnejel pal, Jehoiadá, ex aju t-xuʼjil, Jehoseba, ojtzqintoq kyuʼn qa aju in bʼant tuʼn Atalía nya bʼaʼntoq. Tuʼntzunju, xi kyqʼon kyibʼ tuʼn kykyim noq tuʼn t-xi kyewin jun tal tchman Atalía, aju tal neʼ Jehoás tbʼi. Atz chʼiy kyuʼn toj tja Dios.

Tej qʼiʼntoq wuq abʼqʼi tuʼn Jehoás, ok tchmoʼn Jehoiadá kykyaqil qe nejenel kye soldad ex qe aj Leví. Xi tqʼamaʼn kye: «Kyxqʼuqiʼnke ttziʼ tja Dios. Miʼn txi kyqʼoʼne ambʼil tuʼn tokx ni jun xjal». Yajxitl, jax tqʼoʼn Jehoiadá jun tiʼ toj twiʼ Jehoás tuʼn tok te aj kawil te Judá. E jawtzun ẍchʼin qe xjal te Judá: «¡Bʼaʼnwt tzʼel tqʼij aj kawil!».

Tbʼi reina Atalía tqʼajqʼajel kywiʼ xjal ex xi karelin toj tja Dios. Tej tok tqʼoʼn twitz tiʼj akʼaj aj kawil, jaw ẍchʼin: «¡Ma che ok meltzʼaje wiʼje! ¡Ma che ok meltzʼaje wiʼje!». Tzyet nya bʼaʼn reina kyuʼn qe nejenel kye soldad, xi kyiʼn ex kubʼ kybʼyoʼn. Otoq kyaj tqʼoʼn jun nya bʼaʼn techel kywitz aj Judá. ¿Tiʼtoq kbʼajel?

Onin Jehoiadá tuʼn tkyaj bʼant tiʼj jun kyyol aj Judá tukʼil Jehová. Tukʼil yol lu, xi kytziyen te Dios tuʼn kykʼulin oʼkx te. Xi tqʼamaʼn Jehoiadá tuʼn tkubʼ kyxiten qe ja te kʼulbʼil te Baal ex qe tilbʼilal. Ok tqʼoʼn qe pal ex qe aj  Leví tuʼn kyaqʼunan tiʼj tja Jehová tuʼntzun kykʼulin juntl maj xjal te. Ax ikx e kubʼ tqʼoʼn qe xqʼuqil ttziʼ tja Dios tuʼntzun miʼn tokx jun xjal tzʼil. Yajxitl, xi qʼiʼn Jehoás tuʼn Jehoiadá ex qe nejenel kye soldad toj ja te kawbʼil ex kubʼ kyqʼoʼn toj tqʼuqbʼil. E jaw tzalajxix xjal te Judá tuʼn jlu. Jakutoq che ajbʼen jaʼlo te Jehová, tuʼnju ya mintiʼtoq aju nya bʼaʼn reina Atalía ex aju kʼulbʼil te Baal. ¿Tzajpetzulo xobʼ Jehoiadá? ¿In nelpe tnikʼa tiʼj qa tuʼn jlu onin kyiʼj nim xjal?