Jezabel, yëˈë nyëëxˈäjttë Atalía ets nanduˈun jantsy axëkjäˈäy yˈijty. Atalía yëˈë pyëjk ja rey diˈib Judá, ets ko yˈoˈky, ta ja myäänk tyëjkë anaˈambë. Per ko ja myäänk yˈoˈky, ta yëˈë ojts tmëwëˈëmë ja kutujktakn. Ets parë nipën kyapëjkxëdët, ta ojts dyaˈoˈktäˈäy ja reyë yˈuˈunk yˈënäˈk ets niˈamukë diˈib mbäät tmëwëˈëmëdë ja anaˈamën. ¡Axtë yaˈoˈk ja yˈokˈënäˈk! Pääty niˈamukë ja jäˈäy tsyëˈkëdë.

Per ja saserdotë wintsën, Jehoiadá, ets ja kyudëjk, Jehoseba, nyijäˈäwëdëbë nety ko jantsy axëëk extëmë Atalía yˈadëˈëtsy. Pääty tpëjtaktë ja jyukyˈäjtën oˈkën jëjpˈam ko ojts dyuˈutstë niduˈuk ja Atalía yˈok, Jehoás, diˈibë nety maxuˈunknëm. Jap ojts dyajˈyaaktë mä ja templë.

Ko Jehoás tmëdäjty jëxtujkë jyëmëjt, ta Jehoiadá dyajtuˈukmujky niˈamukë ja wintsëndëjk diˈib tëjkkuentˈäjttëp ets ja lebitëty, ta tˈanmääy: “Kuentˈattë templë tëjkˈääw. Ets nipën xykyayajtëkëdët”. Ta netë Jehoiadá ojts tpëjtakë kyoronë ja Jehoás parë yëˈë tyunët rey jam Judá. Ta ja nax käjpn yaxkaktë: “¡Waˈan mëj tˈity ja rey!”.

Ta ja reyna Atalía tmëdooy ko jäˈäy yäˈäx jyoktë, ta ojts nyijkxy pyëyeˈegyë mä ja templë. Ko tˈijxy ja jembyë rey, ta yaxkeky: “¡Yajnibëdëˈkpëts! ¡Yajnibëdëˈkpëts!”. Ta ja wintsëndëjk diˈib tëjkkuentˈäjttëp myäjtsëdë, yajpëtsëëmëdë mä ja templë ets yaˈoˈkëdë. Tyäˈädë reyna jantsy axëëgë nety të tmoˈoyë ijxpajtën ja nax käjpn. ¿Ti net ok tuun jäjttë?

Jehoiadá ta tpudëjkë ja nax käjpn parë ttukwandaktë Jyobaa ko yëˈëyë myëdunandëp ets yˈawdatandëp. Ojts tniˈanaˈamë parë yajjitët mä nety të yajkojy ja tyemplë Baal ets kyutëgooytyaˈayët ja awinax. Pyëjtak ja saserdotëty ets ja lebitëty parë tyundët mä Jyobaa tyemplë ets parë mbäät jatëgokë jäˈäy jap myindë  Diosˈawdäjtpë. Nan pyëjtak pënaty kyuentˈattëp ja templë tëjkˈääw këdiibë pën tyëkët diˈib kyaj wyäˈätsëty. Ta net ja Jehoiadá mët ja wintsëndëjk diˈib tëjkkuentˈäjttëp ojts twoownëjkxtë Jehoás mä ja palasyë ets dyajnaxwaˈtstë mä ja kutujktakn. Ja nax käjpn diˈib Judá jantsy jotkujk nyayjäˈäwëdë, pes mbäädë nety tmëdundë Jyobaa. Të nety yˈoˈknë ja Atalía ets nan të nety kyutëgooytyaˈay mä yaˈˈawdaty ja Baal. Wiˈix mˈokwinmay, ¿jotmëkëdaa Jehoiadá yˈijty? ¿Mbëjkypyë kuentë ko pääty nimayë jäˈäy tpudëjkë?