Yezebele wakweti umwana umwanaci uwi izina lyakuti Ataliya, uwacitanga iviipe wakwe nyina. Ataliya watwazilwe uku mwene uwa mu Yuda. Lino iya wafwile, umwana wakwe u watandiike ukuteeka. Nomba lino umwana wakwe wafwile, Ataliya waisile ukuya kateeka uwa mu Yuda. Wakomile yonsi aali nu kutandika ukuteeka kumwi sile na aizikulu yakwe. Antu yonsi yamutiinanga.

Simapepo Mukalamba Yeoyada na Yeosyeba muci wakwe, yaamanyile ukuti vino Ataliya wacitanga vyali viipe sana. Iisile umi wao umu uzanzo lino yaafisile umwizikulu wakwe Ataliya, uwi izina ilyakuti Yoasyi ala acili akanya. Yamusungiile umwi tempele.

Lino Yoasyi wali ni myaka 7, Yeoyada wakolonganike intunguluzi na Ina Levi ayaneena ati: ‘Mwimilile pa milyango iitempele, nupya mutaleka ali wensi aingile.’ Lyene Yeoyada wisile Yoasyi ukuya umwene uwa mu Yuda nu kumuzwika icisote ica wene. Aikazi aa mu Yuda yapunzile iyati: ‘Wikale amanda aingi mwene!’

Namwene Ataliya uvwile vino antu yapunzile nupya waile zuwa zuwa ukwi tempele. Lino waweni wino isile apa wene wapunzile ati: “Wansangukila! Wansangukila!” Intulunguluzi zya musenzile iziya izimukoma. Nomba cali uli pa viipe vino walenziile uluko lonsi ukucita?

Yeoyada wazwilizye uluko ukucita upangano na Yeova muno yalavile ukuti yalapepa Yeova wenga sile. Lyene Yeoyada waneenyile antu ukuti yabongolole itempele lyakwe Baali nu kutamola ivilubi. Wasonsile ya simapepo na Ina Levi kuti  yaombela api tempele pakuti antu yangatandika ukupepelapo nupya. Wisile yamalonda pa mpongolo kuti yalinda itempele pakuti umuntu ali wensi umukowele atingila. Lyene Yeoyada ni ntunguluzi yasenzile Yoasyi ukwi isano nu kumwika pa cilimba ica wene. Antu aa mu Yuda yatemilwe sana. Yatandike ukupepa Yeova, nupya yakulwilwe u ku kupepa Baali na kuli Ataliya uwali mwipe. Uzye watulola vino ukusipa kwakwe Yeoyada kwazwilizye antu aingi?