LEZZJONI 53
Il-kuraġġ li wera Ġeħojada
Ġeżabel kellha tifla jisimha Għatalija, li kienet kattiva daqsha. Għatalija kienet miżżewġa lis-sultan taʼ Ġuda. Meta r-raġel tagħha miet, it-tifel beda jmexxi minfloku. Imma meta miet it-tifel, Għatalija ddeċidiet li tibda tmexxi hi lill-poplu taʼ Ġuda. Imbagħad, hi bdiet tipprova teqred il-linja rjali kollha, billi qatlet lil kull min kellu d-dritt imexxi minflokha, anki lis-subien tat-tifel tagħha stess. Kulħadd kien jibżaʼ minnha.
Il-Qassis il-Kbir Ġeħojada u martu, Ġeħoseba, kienu jafu li dak li kienet qed tagħmel Għatalija kien ħażin ħafna. Huma rriskjaw ħajjithom biex jaħbu lit-tarbija, Ġeħogħas, li kien jiġi it-tifel tat-tifel taʼ Għatalija. Huma rabbewh fit-tempju.
Meta Ġeħogħas kellu sebaʼ snin, Ġeħojada laqqaʼ lill-kapijiet u l-Leviti u qalilhom: ‘Oqogħdu għassa mal-bibien tat-tempju, u tħallu lil ħadd jidħol.’ Imbagħad, Ġeħojada libbes kuruna lil Ġeħogħas u għamlu sultan taʼ Ġuda. In-nies taʼ Ġuda għajtu bil-ferħ: ‘Ħa jgħix is-sultan!’
Is-Sultana Għatalija semgħet l-għajjat tan-nies, u allura telqet tiġri lejn it-tempju. Meta rat lis-sultan il-ġdid, hi għajtet: “Konfoffa! Konfoffa!” Il-kapijiet qabdu lil din is-sultana l-kattiva, ħarġuha ’l barra, u qatluha. Xi ngħidu dwar l-eżempju ħażin li Għatalija ħalliet fuq in-nies?
Ġeħojada għen lin-nies tiegħu biex jagħmlu patt maʼ Ġeħova li fih wiegħdu li se jaqdu biss Lilu. Ġeħojada qered it-tempju taʼ Bagħal u kisser l-idoli f’biċċiet. Hu għażel qassisin u Leviti biex jaħdmu fit-tempju ħalli n-nies ikunu jistgħu
jerġgħu jqimu fih. Poġġa rġiel għassa mal-bibien tat-tempju biex nies li ma kinux nodfa f’għajnejn Ġeħova ma jidħlux. Imbagħad, Ġeħojada u l-kapijiet ħadu lil Ġeħogħas ġol-palazz u qegħduh fuq it-tron. In-nies taʼ Ġuda ferħu ħafna. Fl-aħħar, huma setgħu jqimu lil Ġeħova, għax is-sultana l-kattiva Għatalija u l-qima taʼ Bagħal ġew meqrudin. Tistaʼ tara kif il-kuraġġ taʼ Ġeħojada għen lil ħafna nies?“Tibżgħux minn dawk li joqtlu l-ġisem imma ma jistgħux joqtlu r-ruħ; imma minflok ibżgħu minn dak li jistaʼ jeqred kemm ir-ruħ u kemm il-ġisem f’Geħenna.”—Mattew 10:28