Jezabel kipixtoya se iichpoka tlen motokaxtiyaya Atalía uan nojkia kichiuayaya tlen amo kuali. Atalía monamiktik iuaya nopa tlanauatijketl tlen Judá. Kema iueue mijki, ikone Ocozías pejki tlanauatia. Uan kema ikone nojkia mijki, ya pejki tlanauatia. San ya kinekiyaya tlanauatis, yeka kinmiktik nochi Ocozías ikoneuaj uan nochi katli ueliskiaj kikuilisej itlanauatijkayo. ¡Kinmiktik iixuiuaj! Yeka miakej kimakasiyayaj.

Nopa sumo sacerdote Joiada uan isiua Josaba, kimatiyayaj Atalía kichiuayaya tlen amo kuali. Yeka, maske kimatiyayaj ueliskiaj kinmiktisej, kitlatijkej se Atalía iixui tlen motokaxtiyaya Joás, uan kiiskaltijkej ipan teokali.

Kema Joás kipixtoya chikome xiuitl, Joiada kinsentilik nochi tlayakananij uan levitas, uan kiniljuik: “Xitlamokuitlauikaj ipan kaltemitl. Amo aka xijkauakaj ma kalaki”. Teipa, Joiada kitlalilik Joás se corona, kiampa kinextik yaya eliskia tlanauatijketl ipan Judá. Uajka nochi judáeuanij tlauel yolpajkej kema kiitakej inintlanauatijka.

Atalía kikajki maseualmej tlauejchiuayayaj, yeka nimantsi yajki ipan teokali. Kema kiitak nopa yankuik tlanauatijketl, chikauak kiijtok: “Innechkualankaitaj uan inkitlalijtokej seyok inmotlanauatijka kej nopatlaka”. Nopa tlayakananij kiitskijkej Atalía uan kimiktitoj. ¿Tlake panoskia ika nochi nopa tlamantli tlen amo kuali tlen Atalía kichijtoya?

Joiada kinpaleuik judáeuanij ma kichiuakaj se tlajtolsenkaualistli iuaya Jehová kampa kiijtojkej san Jehová kiueyichiuaskiaj. Joiada tlanauatik ma kixoleuakaj nopa kali kampa kiueyichiuayayaj Baal uan ma kintlatlapatsakaj teteyomej. Kintlalik sacerdotes uan levitas ma tekitikaj ipan teokali, kiampa  ueliskiaj sampa kiueyichiuasej Jehová. Nojkia kintlalik tlamokuitlauianij, kiampa amo kalakiskiaj ipan teokali katli amo kinamikiyaya kalakisej. Teipa, Joiada uan nopa tlayakananij kiuikakej Joás ipan nopa kali kampa tlanauatiskia uan kiseuijkej ipan isilla. Judáeuanij tlauel yolpajkej pampa sampa kitekipanoskiaj Jehová. Atalía ayokmo itstoya uan ayokmo aka kiueyichiuayaya Baal. ¿Tikitak kenijkatsa Joiada kinpaleuik miakej maseualmej pampa amo majmajki?