Jezabel kipiak se siuapil akin monotsaya Atalía uan no tel amo yolkuali katka kemej imomaj. Atalía monamiktij iuan akin tekiuajtia Judá. Keman itakauj momikilij, ikoneuj peuak tekiuajti. Uan keman ikoneuj momikilij, Atalía moaxkatilij tekiuajyot tein yetoya Judá. Kemej amo kinekia maj nion akin kikuiliani tekiuajyot, kitemoj kinmiktis nochin akin ueliskiaj tekiuajtiskej. ¡Hasta kinmiktij iixuiuan! Yejua ika, nochin kimouiliayaj.

Jehoiadá, akin kinixyekanaya tiopixkamej, uan inamik, Jehoseba, kimatiaj ke tein Atalía kichiujtoya tel amo kuali katka. Yejua ika, maski ueliskia kinmiktiskej, kitatijkej semej iixuiuan Atalía, se konetsin akin monotsaya Jehoás. Kiiskaltijkej itech templo.

Keman Jehoás kipiaya chikome xiuit, Jehoiadá kinsentilij nochin akin kinixyekanayaj tajpianij uan levitas. Kiniluij: “Xitapijpiakan ikalakyan templo. Amo xikauakan maj nion akin kalaki”. Ompa, Jehoiadá kiixtalij Jehoás kemej tekiuaj ompa Judá uan kikuatalilij corona. Akin nemiaj Judá tel yolpakkej.

Atalía kikakik ke taltikpakneminij tel yolpakiaj uan ijsiujka yajki templo. Keman kiitak yankuik tekiuaj, kijtoj chikauak: “¡Nanechichtakauijkej! ¡Nanechichtakauijkej!”. Akin kinixyekanayaj tajpianij kikitskijkej Atalía, kikixtijkej uan kimiktijkej. Yejua tel amo kuali neskayot kinkauilijka akin nemiaj Judá. ¿Toni panoskia axkan?

Jehoiadá kinpaleuij akin nemiaj Judá maj motenkauanij iuan Jiova ke sayoj yejuatsin kiueyichiuaskiaj. Jehoiadá kichiuak maj kixitinianij templo kampa kiueyichiuayaj Baal  uan maj kinixpolouanij tiotsitsin. Kintalij tiopixkamej uan levitas maj tekitinij itech itemplo Jiova uan ijkon taltikpakneminij oksepa ompa ueliskia kiueyichiuaskej. No kintalij tapijpianij itech templo akin kiitaskiaj maj amo kalakini nion se taltikpaknenkej akin amo chipauak. Satepan, Jehoiadá uan akin kinixyekanayaj tajpianij kiuikakej Jehoás itech kali kampa tekiuajtiskia uan kitalijkej itech trono. Akin nemiaj Judá tel yolpakkej. Axkan ueliajya kitekitiliayaj Jiova porin amo nemiaok Atalía uan amo akinok kiueyichiuaya Baal. ¿Tikita ke Jehoiadá kinpaleuij tel miakej porin yolchikauak katka?