Omukwaniilwakiintu Isebel okwa li e na omwanakadhona Atalia, ngoka naye a li omukolokoshi e mu fa. Atalia okwa li omunyekadhi, a hokanwa komukwaniilwa gwaJuda. Sho omusamane gwe a si, omwanamati okwa tameke okulela. Sho omwanamati a si, Atalia okwi iningi ye mwene omuleli gwaJuda. Konima yaashono, Atalia okwa kambadhala a hulithe po ezimo alihe lyaakwaniilwa. Okwa dhipagitha kehe gumwe ngoka a li e wete kutya ota vulu okuninga omukwaniilwa, mwa kwatelwa naatekulu ye nokuli. Kehe gumwe okwa li a tila Atalia.

Omuyambi Omukuluntu Jehoiada nomukulukadhi gwe, Josheba, oya li ye shi kutya shoka Atalia ta ningi osha puka. Oya tula oomwenyo dhawo moshiponga, e taya holeke Joas, omutekulu gwaAtalia. Joas okwa putukile motempeli.

Sho Joas e na omimvo heyali, Jehoiada okwa gongele omalenga agehe nosho wo Aalevi. Okwe ya lombwele a ti: ‘Tonateleni omiyelo dhotempeli, ne inamu etha nando ogumwe a ye mo.’ Opo ihe Jehoiada okwa ningi Joas omukwaniilwa gwaJuda, e te mu zaleke oshishani komutse gwe. Aantu muJuda oyi igidha ya ti: ‘Omukwaniilwa na kale nomwenyo omule.’

Atalia sho u uvu ekudhilo lyongundu yaantu, okwe endelele u uka kotempeli. Okwa mono omukwaniilwa Joas, ngoka opo a langekwa po. Atalia okwi igidha a ti: “Mwa kotokele ndje! Mwa kotokele ndje!” Omalenga oge mu kwata po, e tage mu pititha mo motempeli, e ta ge mu dhipaga. Mbela Jehoiada okwa li a ningi po shike, opo a kwathele oshigwana kenwethomo ewinayi lyaAtalia?

Jehoiada okwa kwathele oshigwana shi hangane ishewe naJehova. Oshigwana oshu uvaneke kutya otashi ka longela owala Jehova. Okuza mpono Jehoiada okwa lombwele oshigwana shi kumune po otempeli yaBaal nosho wo iiyelekelakalunga. Okwa langeke po  aayambi nosho wo Aalevi ya longe motempeli, opo aantu ya tameke okulongela ishewe Jehova. Jehoiada okwa langeke po aatonateli yopomiyelo ya tonatele otempeli, opo kehe gumwe ngoka a nyata kaa vule okuya mo. Opo nduno Jehoiada nomalenga oya fala Joas muuwa, e ta ye mu kuutumbike koshipangelapundi. Oshigwana shaJuda osha li sha nyanyukwa. Omolwashike mbela? Oshoka osha li tashi longele Jehova, sha manguluka ko kenwethomo ewinayi lyaAtalia nosho wo kokulongela Baal. Mbela owu wete ngaa nkene uulaadhi waJehoiada wa kwathele aantu oyendji?