Isebele o be a na le morwedi yo a bitšwago Athalia, gomme le yena a na le pelo e mpe go swana le mmagwe. Athalia o be a nyetšwe ke kgoši ya Juda. Ge monna wa gagwe a hwile, morwa wa bona o ile a buša e le kgoši. Eupša morwa yoo le yena o ile a hwa, gomme Athalia a itira kgoši ya Juda. Athalia o ile a leka go fediša batho ka moka ba ka bogošing, gomme a bolaya yo mongwe le yo mongwe yo a bego a ka ba kgoši, a bolaya le setlogolo sa gagwe. Batho ka moka ba be ba mo tšhaba.

Moperisita yo a Phagamego Jehoyada le mosadi wa gagwe e lego Jehosheba, ba be ba tseba gore seo Athalia a se dirago ga se sa loka. Le ge ba be ba tseba gore Athalia a ka ba bolaya, ba ile ba ipea kotsing ya go bolawa gomme ba uta lesea leo e bego e le setlogolo sa Athalia. Leina la lesea leo e be e le Jehoashe. Ba ile ba godišetša lesea leo tempeleng.

Ge Jehoashe a na le mengwaga e šupago, Jehoyada o ile a kgoboketša dikgošana ka moka le Balefi gomme a re go bona: ‘Beang baleti mejakong ya tempele ya Jehofa gomme le se ke la dumelela motho a tsena.’ Ke moka Jehoyada a dira gore Jehoashe e be kgoši ya Juda, gomme a mo rweša kgare hlogong. Batho ba Juda ba goeletša ba re: “Anke kgoši e phele!”

Mohumagadi Athalia o ile a kwa lešata leo gomme a kitimela tempeleng ya Jehofa. Ge a bona kgoši yeo e mpsha, a goeletša a re: “Maanomabe! Maanomabe!” Ke moka dikgošana tša swara mohumagadi yoo wa pelo e mpe, tša tloga le yena gomme tša fihla tša mmolaya. Eupša go be go tla direga eng ka setšhaba sa Juda seo Athalia a bego a se rutile go dira dilo tše mpe?

Jehoashe o ile a thuša setšhaba sa Juda go dira kgwerano le Jehofa, gomme sa tshepiša Jehofa gore se tla rapela yena feela. Jehoyada o ile a dira gore setšhaba se senye tempele ya modimo wa Baali le go pšhatlaganya medimo ya maaka. O ile a kgetha baperisita le Balefi gore ba šome tempeleng e le gore batho ba kgone go rapela Jehofa gape. O ile a bea batho gore ba lete mejakong ya tempele e le gore go se ke gwa tsena batho bao ba sa hlwekago. Ke moka Jehoyada le dikgošana ba iša Jehoashe ntlong ya kgoši gomme ba mo dudiša sedulong sa bogoši. Setšhaba ka moka sa Juda sa thaba. Setšhaba se ile sa kgona go šomela Jehofa se sa šitišwe ke Athalia wa pelo e mpe le borapedi bja Baali. Na o a bona gore sebete sa Jehoyada se ile sa thuša batho ba bantši?