Jezabele ankho una omona omuhikuena utiwa o Atalia iya ankho omukalavi nga ina. Atalia anepwa no Hamba yo ko Judaa. Etyi ohamba yankhia omona wae Atalia akala ohamba yo mo Judaa. Mahi etyi omona wae ankhia, Atalia atokola okukala onkhai-hamba yo mo Judaa. Moluotyo aipaa ovanthu aveho vatuka mohamba, aipaa alo umwe ovatekula vatyo. Ovanthu aveho ankho vemutila owoma.

Omunene-nakwa wavilapo Jeoiada nomukai wae Jeoseba, ankho vetyii okuti ovipuka Atalia ekahi nokulinga viapenga. Avapake omuenyo wavo motyitateka etyi vaholeka omutekula wa Atalia olukembe lutiwa o Joasi. Veluholeka mondyuo ya Huku.

Puetyi Joasi ena omanima epandu-vali Jeoiada aongiya ovalume aveho vankhimana no va Levita no vomo Judaa, evepopila okuti: ‘Yungei omapito ondyuo ya Huku, muhayekei munyingile ovanthu.’ Jeoiada alingi Joasi akale ohamba yo mo Judaa emupake ohala komutwe. Ovanthu vomo Judaa avapopila peulu okuti: ‘Ohamba ikaleko apeho!’

Onkhai-hamba Atalia yeiva ovanthu vapopila peulu iya ahatekela kondyuo ya Huku. Etyi amona ohamba omphe ahimbika okuliyavela okuti: ‘Nayondyua! Nayondyua!’ Ovalume vankhimana avapolo onkhai-hamba onkhalavi aveituala pondye aveipaa. Mahi oñgeni ovipuka vina ovivi ankho alinga viakala?

Jeoiada akuatesako elongo okulinga omphango na Jeova iya avatokola okufenda vala Jeova. Jeoiada avahanyepo ondyuo ya Baale novilolo. Jeoiada aholovona ovanakwa no va Levita opo vaundape mondyuo ya  Huku, ngotyo ankho ovanthu pahe vapondola okufenda vali Huku. Tupu aholovona ovanthu vayunge ondyuo ya Huku opo muhanyingile ovanthu vasila. Jeoiada novanthu ovakuavo avatuala Joasi kondyuo yo hamba iya avemupake kotyipundi tyoutumini. Ovanthu vomo Judaa avahambukwa unene. Ankho vapondola okuumbila Jeova, tupu pahe vayovoka kondingavivi Atalia no kefendelo lia Baale. Wetyimona oñgeni Jeoiada akala nomutima wakola akuatesako ovanthu ovanyingi?