CAPÍTULO 53
Joiada mana manchachikoj karqa
Ataliaqa maman Jezabel jina manchay sajra karqa. Payqa Judá llajtamanta reywan casarakorqa. Chay rey wañupojtintaj wawanku rey karqa. Wawanku wañupojtintaj Ataliaqa payllamanta kamachiyta qallarerqa. Mana pipis cuentanmanta kamachinanpajtaj alchhisninta, reypa tukuynin familianta ima wañuracherqa. Chayrayku tukuy runas payta manchachikoj kanku.
Kuraj kaj sacerdote Joiadawan warmin Josabawanqa yacharqanku Ataliaj ruwasqan mana allinchu kasqanta. Chayrayku kausayninkuta wañuy pataman churaspa Ataliaj ujnin alchhinta pakaykorqanku. Chay alchhinqa uña wawitallaraj karqa, Joastaj sutikorqa. Joastaqa Diospa templonpi uywarqanku.
Joiadaqa soldadosta kamachejkunata, levitasta ima tantaykorqa Joás 7 watitasniyoj kashajtin. Paykunamantaj nerqa: “Temploj punkusninta qhawaychej ni pi yaykumunanpaj”, nispa. Chantá Joiadaqa Joaspa umanman pilluta churaykorqa Judamanta rey kananpaj. Runastaj qhaparerqanku: “¡Kausachun reyqa!”, nispa.
Chayta uyarispa reina Ataliaqa usqhayllata temploman correrqa. Waj reyta rikuspataj qhaparerqa: “Kayqa wasanchay, wasanchay”, nispa. Soldadosta kamachejkunataj Ataliata japʼiytawan wañuchimorqanku. Chay warmeqa millay imasta ruwarqa.
Joiadaqa runasta yanaparqa Jehová Dioswan uj tratota ruwanankupaj. Chay tratopitaj Jehovallata yupaychanankuta nerqanku. Chantá Joiadaqa Baalpa templonta, santosninta ima urmachicherqa. Diospa templonpitaj sacerdotesta, levitasta
ima churarqa, runas watejmanta Jehová Diosta yupaychanankupaj. Chantapis templota qhawajkunata churarqa, chʼichipaj qhawasqa runas mana yaykunankupaj. Chantá Joiadaqa, soldadosta kamachejkunawan Joasta kamachina wasiman pusarqa, kamachina tiyanapitaj tiyaykucherqa. Judamanta runastaj mayta kusikorqanku. Imaraykuchus chay sajra warmi wañorqaña, nitaj Baalta yupaychaypis karqañachu. Joiadaqa mana manchachikusqanrayku ashkha runasta yanaparqa.“Qankunata wañuchiyta atejkunataqa ama manchachikuychejchu, mana paykunamantachu kashan qhepaman kausarimunaykichejqa. Astawanpis pichus Hinón Wayqʼopi qankunata chinkachiyta atin, chayta manchachikuychej” (Mateo 10:28).