Jezabelca Atalía shuti ushushitami charirca. Paica paipaj mama shinami millai carca. Judá llajtata mandajhuanmi Ataliaca cazararca. Paipaj cusa huañujpica paipaj churimi mandai callarirca. Cutin churi huañujpica Ataliami mandai callarirca. Paipaj randi pi ama mandachunmi reypaj tucui huahua huahuacunata huañuchirca. Chaimantami tucuicuna paita manchajcuna carca.

Atalía millaita ruracushcatami sacerdotecunata mandaj Joiadapish (Jehoiadá) paipaj huarmipish ricurcacuna. Chaimantami huañunata mana manchashpa Ataliapaj nietota pacashpa Diospaj huasipi huiñachirca. Cai huahuaca Joás (Jehoás) shutimi carca.

Joás 7 huatacunata charijpimi Joiadaca soldadocunata mandajcunatapish levitacunatapish tandachirca. Chaipimi, ‘Diospaj huasimanca ama pi yaicuchun saquinguichij’ nirca. Qꞌuipaca Judá llajtata mandachunmi Joiadaca Joaspaj umapi coronata churarca. Gentecunaca, ‘¡paimari ñucanchijta mandaj!’ nishpami caparircacuna.

Diospaj huasipi caparicushcata uyashpami Ataliaca chaiman callpashpa rirca. Mushuj mandajta ricushpaca, ‘¡mana huillashpamari ñucataca huashalla surcushcacuna!’ nishpami caparirca. Soldadocunata mandajcunaca chai millai huarmita llujshichishpami huañuchircacuna. Paica tucuicunatami millaita rurachishca carca. ¿Qꞌuipaca imashi tucurca?

Joiadaca Judapi causajcunataca Jehová Diosllata sirvichunmi ari nichirca. Qꞌuipaca Baalpaj huasita, rurashcalla dioscunatapish urmachishpami ñutuchirca. Gentecuna Diosta cutin adorachunmi sacerdotecunata, levitacunatapish  Diospaj huasipi trabajachun churarca. Diospaj huasiman mapata ruraj runa ama yaicuchunpishmi soldadocunata churarca. Qꞌuipaca Joiadapish soldadocunata mandajcunapish Joastaca mandana ucuman pushashpami mandanapi tiyachircacuna. Gentecunaca achcatami cushicurcacuna. Atalía ña mana mandacushcamanta, Baalta adoranapish tucurishcamantami Diosta alli sirvi tucurcacuna. Joiadaca mana manchaj cashcamantami achca gentecunata ayudashca canga ¿nachu?