Jezabelpa jujnin wawanmi karan Atalía, paypas maman jinan millay karan. Payqa Judá nacionpi reywanmi casarakuran. Qosan wañupuqtinmi wawan kamachiyta qallariran. Wawan wañupuqtintaq Ataliaqa payñataq kamachiyta qallariran. Jinaspa reypa familianmanta llapa qharikunata wañuchiran, chhaynapi pipas reyna kasqanmanta mana orqonanpaq. Chaymi llapallanku payta manchakuqku.

Uma sacerdote Jehoiadapas (Joiada) esposanpas yacharankun Ataliaq ruwasqanqa millay kasqanta. Jinan vidankuta peligropi churasparaq Ataliaq jujnin nietonta templopi pakaspa uywaranku. Chay wawaq sutinmi karan Jehoás (Joás).

Jehoás qanchis watanpi kashaqtinmi Jehoiadaqa umalliqkunata leví runakunatapas templopi juñuran. Kamachirantaq ama pipas jaykumunanpaq, jinaspa Jehoaspa umanman coronata churaran Judá nacionpi rey kananpaq. Jinan runakunaqa niranku: “Kausachun reyninchis”, nispa.

Ataliaqa uyarisqan runakunaq bulla ruwasqankuta, jinan temploman rispa reyta rikuran, nirantaq: “¡Noqa contran sayarinku!”, nispa. Umallikunataq payta jap’ispanku jawapi wañuchiranku. Payqa mana allin ejemplon runakunapaq karan. ¿Iman chay qhepaman pasaran?

Jehoiadaqa Israel runakunatan yanaparan Jehová Diosllata servinankupaq prometekunankupaq. Jinaspapas thunichiranmi Baalpa templonta idolonkunatapas. Chaymantapas Jehová Diospa templonta allichanankupaqmi llank’aqkunata churaran. Guardiakunatapas  churaranmi común runakuna ama jaykunankupaq. Chaymantataq Jehoasta palacionman aparanku Judá nacionta kamachinanpaq. Wajmantan runakunaqa kusisqa tiyaranku. Manañan Ataliapas idolokuna adoraypas karanñachu. Jehoiadaqa mana manchakuqmi karan ¿riki? Chhayna kasqanqa jujkunatan yanaparan.