Е Језавела сине ла чхај со викинела пе Готолија, ој сине бут лошно исто сар пи дај. И Готолија сине женими е цареа тари Јуда. Кеда муло лакоро ром, почминѓа те владинел лакоро чхаво. Ама, кеда муло ов да, и Готолија керѓа ој те овел царица ки Јуда. Тегани ој трудинѓа пе те уништинел цело царско фамилија, адалеа со мударела сине саринен со шај сине те овен царија ко лакоро тхан. Ој чак мударела сине пе унукон! Сарине дарана сине латар.

О првосвештенико о Јодај хем лескири ромни и Јосавета, џанена сине кај адава со керела и Готолија тано бут лошно. Ола чхивѓе ки опасност пумаре животија адалеа со гаравѓе јекхе таро унукија е Готолијакере. Лескоро анав сине Јоас. Ола бајрарѓе ле ко храми.

Кеда о Јоас сине ле ефта берш, о Јодај викинѓа са е заповедникон хем е левитен хем вакерѓа ленге: „Терѓовен англо удара е храмескоро хем ма мукхен никас те кхувел андре“. Тегани, о Јодај чхивѓа е Јоасе те овел цари ки Јуда хем чхивѓа леске круна ко шеро. О мануша тари Јуда почминѓе те викинен: „Те живинел о цари!“

И царица, и Готолија, шунѓа и галама таро мануша хем одма гели ко храми. Кеда дикхља е неве царе почминѓа те викинел: „Керѓен плани против манде!“ О заповедникија астарѓе е лошно царица, икалѓе ла таро храми хем мударѓе ла. Дали о народо почминѓа те служинел е Јеховаске пало лакоро мерибе?

О Јодај поможинѓа е народоске те керел сојуз е Јеховаја колеа со ветинѓе кај ка служинен само леске. О Јодај вакерѓа ленге те рушинен о храми е Ваалескоро хем те пхаѓен о идолија ко котора. Ов чхивѓа  е свештеникон хем е левитен те служинен ко храми те шај о народо палем те обожавинел е Јехова адатхе. О Јодај исто аѓаар, чхивѓа стражарија те аракхен о храми те шај те на кхувел некој со нане чисто. Пало адава, о Јодај хем о заповедникија ингарѓе е Јоасе ки палата хем чхивѓе ле ко престол. О народо таро царство Јуда сине бут радосно. Акана и лошно Готолија више на сине хем ола шај сине палем те служинен е Јеховаске, а на е ховавне девлеске, е Ваалеске. Адалеа со сине храбро, о Јодај поможинѓа буте манушенге.