I Jezavelja hine la čhaj koja vičindža pe Gotolija. Oj hine but lošno, isto sar pi daj. I Gotolija hine ženimi e kraljeja andi Juda. Ked mulo olako rom, počmindža te vladini olako čhavo. Ama, ked hem ov mulo, i Gotolija čhivdža kokri pes te ovel kraljica ki Juda. Tegani, oj trudindža pe te uništini celo kraljevsko porodica, adžahar so mudardža sarinen kola šaj te oven kraljija ko olako than. Oj čak mudardža pe unukonen! Sarine darandilje olatar.

O prvosvešteniko, o Jodaj hem oljesi romni i Josaveja, džandže so odova so i Gotolija čerela tano but lošno. Oljengo dživdipe hine ko opasnost odoljese so garavdže jekhe olake unuko. Oljeso nav hine Joas. On barjačerdže lje ko hram.

Ked o Joas hine lje efta berš, o Jodaj vičindža sa e zapovednikonen hem e Leviten hem phendža ljendže: „Terdžoven anglo e hramese udara hem ma mukhen nikas te khuvel andre.“ Tegani, o Jodaj čhivdža e Joase te ovel kralj ki Juda hem čhivdža ljese kruna ko šero. O manuša andi Juda počmindže te vičinen: „Te ovel dživdo o kraljo!“

I kraljica, i Gotolija, šundža sar pištinena o manuša hem odmah dželji ko hram. Ked dikhlja e neve kraljo, počmindža te vičini: „Čerdžen plan protiv mande!“ O zapovednikija doljindže e lošnone kraljica, ikaldže la ando hram hem mudardže la. Ama, da li palo olako meribe o narodo počmindža te služini e Jehovase?

O Jodaj pomožindža e narodose te čeren savez e Jehovaja koljeja obećindže so ka služinen samo oljese. O Jodaj phendža ljendže te rušinen e Valeso hram hem te phagen o idolija ko kotora. Ov čhivdža e sveštenikonen hem e Leviten te služinen ko hram te  šaj o narodo paljem te služini samo e Jehovase. O Jodaj isto adžahar, čhivdža e stražaren te arakhen o hram. Adžahar, naštindža te khuvel niko koj tano nečisto. Palo odova, o Jodaj hem o zapovednikija ljegardže e Joase ki kraljevsko palata hem čhivdže lje te ovel paljem kraljo. O narodo ando judejsko kraljevstvo hine but radosno. Akana, i lošno Gotolija više na hine hem on paljem šajindže te služinen e Jehovase, a na e hovavne devljese, e Valese. Odoljese so hine hrabro, o Jodaj pomožindža bute manušendže.