Кай и Иезавель сас щей Гофолия, вой сас кацави же найлащи сар лати дэй. Ла Гофолияко хулай сас царё андэ Иуда. Кала муля лако хулай, тэ правий ля лэнго шаво. Но, кала муля и о шаво, и Гофолия ля екжэни тэ правий сар царица. И кай нико тэ на залэл латар лако ҭан, вой закамля тэ умарэл всаворэн, кастэ сас право тэ правий андо царство. Вой даже умардя пэстирэ внуконэн. Всаворэ латар фартэ даранас.

О само баро рашай Иодаё и лэстири хулаи и Иосавефа ӷанэнас, кай и Гофолия терэлас фартэ найдраго. Хоть во и моӷ тэ хасарэл и жизня, во гарадя еқэс ла Гофолиятирэ внукос, савэс ақарэнас Иоасо. Вонэ барярэнас лэс, и во жувэлас андо храмо.

Кала лэ Иоасости ашэля семь бэрш, о Иодаё стидя всаворэн лэ барэдэрэн анда царско войско и лэ левитонэн, и ԥэндя лэнди: «Тердён паша вороты андо храмо и на замэкэн интя никас». Тоди о Иодаё ԥэндя англа всаворэ, кай о Иоасо ашэла царёса и стодя пэр лэстэ корона. О народо ля тэ цыпий: «Мэк жувэл амаро царё!»

Кала и царица Гофолия ашундя, сар цыпин, вой прастая каринг о храмо. Сар вой додиқля нэвэ царёс, вой зацыписайля: «Вонэ сԥэндэпэ! Сԥэндэпэ!» И барэдэра анда войско схутилдэ ла найлащя царица, одындярдэ ла и умардэ. Но сар тэ отсытярэн лэ манушэн, кай вонэ тэ на терэн найлащи дила, каринг сави присытярдя лэн и царица?

О Иодаё поможысардя лэ народости тэ стерэн доӷоворо лэ Иеговаса. Всаворэ мануша динэ алав лэ Иеговасти тэ кандэн кати лэс. О Иодаё приԥэндя лэнди тэ розмарэн о цэр лэ Ваалоско и тэ розмарэн всаворэн лэндирэ хохавнэ дэвлэн. Во стодя лэ рашан  и левитонэн тэ терэн лэстири дила андо храмо, кай мануша упалэ тэ тэлён лэ Иеговасти. Кадяжэ во стодя паша лэ храмостирэ вороты манушэн, савэ на мэкэнас никас, ко сас найвужэ андэ лэ Дэвлэстирэ яқа. Тоди о Иодаё и всаворэ барэдэра андэ́ лэ Иоасас андо дворцо и стодэ лэс по царско престоло. Всаворэ мануша фартэ радосавэнас, кай акана вонэ упалэ служина лэ Иеговасти. Пэр лэндэ уже будэр на тасавэлас о найлашимос, саво терэлас и Гофолия, и кадяжэ вонэ парашэлэ тэ тэлён лэ Ваалости. Амэ уӷанглям, кай о Иодаё на дарайля и мануша упалэ линэ тэ служин лэ Иеговасти.