Sa iai se tama teine a Iesepela e igoa iā Atalia, ma e amioleaga e pei o lona tinā. Na faaipoipo Atalia i le tupu o Iuta. Ina ua maliu lana tane, ona avea lea o lana tama tama ma tupu. Ae ina ua maliu lana tama, na fai e Atalia o ia lava ma pule o Iuta. Ona ia taumafai lea e fasiotia fanau uma a le tupu, po o so o se tasi lava e mafai ona avea ma tupu, e oo lava i fanau tama a lana fanau. Na fefefe uma tagata iā te ia.

Na iloa e le ositaulaga sili o Ioiata ma lana avā o Iosape, e matuā leaga mea o loo faia e Atalia. Na lamatia o la ola ina ia faalafi ai le pepe o Ioasa, o ia o se tasi o tama tama a le fanau a Atalia. Na la tausia aʻe o ia i le malumalu.

Ina ua fitu tausaga o Ioasa, ona faapotopoto lea e Ioiata o alii ma le ʻau sa Levi uma ma faapea atu iā i latou: ʻIa leoleo faitotoʻa o le malumalu ma aua neʻi faatagaina se tasi e sau i totonu.’ Ona filifilia lea e Ioiata o Ioasa e avea ma tupu o Iuta, ma tuu le palealii i lona ulu. Na alalaga tagata o Iuta: ʻIa soifua le tupu!’

Na lagona atu e le masiofo o Atalia le pisapisaō o le nuu ma faanatinati atu loa i le malumalu. Ina ua ia iloa atu le tupu fou, ona ia alaga atu lea: “O le fouvale! O le fouvale!” Ae ua ave o ia e alii ma fasiotia o ia. Ae faapefea la ana taaʻiga leaga ua iai i le nuu?

Na fesoasoani Ioiata i le nuu e osia se feagaiga ma Ieova, lea na latou folafola atu ai e na o Ia lava o le a latou tapuaʻi i ai. Na faatonuina e Ioiata i latou e talepe i lalo le malumalu o Paala ma nutililii tupua. Na ia tofia le ʻauositaulaga ma le ʻau sa Levi e galulue i le malumalu, ina ia  mafai ai ona toe tapuaʻi tagata i inā. Na ia tofia ē e leoleoina faitotoʻa ina ia leoleoina le malumalu, ina ia lē mafai ona ulu atu i ai se tasi e lē mamā. Ona ave lea o Ioasa e Ioiata ma alii i le maota o le tupu, ma faanofo o ia i le nofoālii. Na olioli le nuu o Iuta. O lea ua mafai ona latou auauna iā Ieova, ma saʻoloto mai i le masiofo leaga o Atalia ma tapuaʻiga iā Paala. Po ua e iloa le auala na fesoasoani ai le lototele o Ioiata i le toʻatele o tagata?