Jezebeli abenendvodzakati lebeyingu-Athaliya lebeyinenhlitiyo lembi njengaye. Athaliya washada nenkhosi yakaJuda. Ngesikhatsi indvodza yakhe ifa, indvodzana yakhe yaba yinkhosi. Kodvwa nasekufe indvodzana yakhe, Athaliya wabusa live lakaJuda. Wetama kubulala bonkhe bantfwana benkhosi, noma ngubani lebekangabusa esikhundleni sakhe ngisho nebatukulu bakhe lababafana. Bonkhe bantfu bebamesaba.

Umphristi Lophakeme Jehoyada nemkakhe Jehosheba bebati kutsi loko lebekwentiwa ngu-Athaliya bekukubi kakhulu. Babeka kuphila kwabo engotini ngekutsi bafihle Jowashi umtukulu wa-Athaliya longumfana. Bamkhulisela ethempelini.

Ngesikhatsi Jowashi aneminyaka lengu-7 budzala, Jehoyada wabita tonkhe tindvuna kanye nemaLevi, watsi kubo: ‘Manini emnyango wasethempelini, futsi ningavumeli muntfu kutsi angene.’ Jehoyada wase ubeka Jowashi waba yinkhosi yakaJuda futsi wametfwesa umchele webukhosi. Bantfu bakaJuda bamemeta batsi: ‘Lunwele loludze, nkhosi!’

Indlovukazi Athaliya yeva lomsindvo walabantfu yase igijimela ethempelini. Nayibona lenkhosi lensha yamemeta yatsi: ‘Nivukela umbuso! Nivukela umbuso!’ Letindvuna tayibamba lendlovukazi lembi tahamba nayo futsi tayibulala. Kodvwa inhlitiyo yayo lembi yaba namuphi umtselela kulesive?

Jehoyada wasita lesive kutsi sente sivumelwane naJehova, lapho setsembisa kutsi sitawukhonta yena kuphela. Jehoyada watsi akubhidlitwe lithempeli laBhali futsi baphihlite tithico tabo tibe ticucu. Watfuma baphristi kanye nemaLevi kutsi alungise  lithempeli kuze bantfu batawukhontela kulo Nkulunkulu. Wase umisa bomahlalesangweni kuze bagadze kutsi kungangeni muntfu lowenta tintfo letimbi. Jehoyada netindvuna base bamikisa Jowashi esigodlweni futsi bambeka esihlalweni sakhe sebukhosi. Bantfu bakaJuda bajabula. Besebatawukhonta Jehova bakhululekile futsi bangahlushwa ngu-Athaliya kanye netimfundziso taBhali. Uyabona yini kutsi kuba nesibindzi kwaJehoyada kwabasita njani bantfu labanyenti?