Izebel piạ anạe arenge Atalia, i sie dal᷊akị kere i mamạe. Atalia nẹ̌kawing dingangu datu Yehuda. Su tempong kawinge nate, anạe nakoạ datu. Katewe su tempong anạe nate, i Atalia nakoạ měngangawasang Yehuda. Bọu ene, i sie němate kěbị hiteng datu apang botonge měngganti si sie makoạ měngangawasa, maning lai ene pulunge. Kěbị taumata matakụ si sie.

Imang Mawantugẹ̌ Yehoyada dingangu kawinge, Yehosyeba, masingkạ kakanoạ i Atalia sěbạe ral᷊akị. Maning mawahaya, i sire němuni sěmbaụ pulung i Atalia bědang kadodọ, arenge Yehoas. I sire něhiking si Yehoas su bait.

Su tempong umuri Yehoas pitu taung, Yehoyada něngomol᷊ẹ̌ kěbị těmbonangu pasukan dingangu tau Lewi, bọu ene nẹ̌bera, ’Diagạ tukadu bait. Abe sarang piạ u sumuẹ̌.’ Bọu ene, i Yehoyada něhengkẹ si Yehoas nakoạ datung Yehuda kụ nẹ̌taho mahkota su těmbọe. Su tempong nakasilo ene, tau Yehuda němansagẹ̌ mal᷊uasẹ̌.

Ratu Atalia nakaringihẹ̌ tingihu taumata ene kụ apidu masahawụ nakoạ sarang bait. Su tempong i sie nakasilo datu wuhu, i sie němansagẹ̌, ”Pengkhianatan! Pengkhianatan!” Manga těmbonangu pasukan něnamẹ ratu ral᷊akị ene, nẹ̌bawa si sie pakarau, bọu ene němate si sie. Katewe, apa nariadi su bangsa ene ual᷊ingu seng nakaěbạ pengaruh dal᷊akị bọu i Atalia?

Yehoyada nẹ̌tul᷊ung bangsa ene někoạ pẹ̌dariandi dingangi Yehuwa. I sire nẹ̌diandi kětạeng maněmbah si Yehuwa. Yehoyada něngoro si sire pěndusa manga berhala dingangu tampạ pěnaněmbang Baal. I sie něhengkẹ manga imang dingangu  tau Lewi gunang měhal᷊ẹ̌ su bait, tadeạu bangsa ene saụ botonge měngibadah sene. I sie něngoro tukadu bait pakiriagạ, tadeạu taumata najis tawe makasuẹ̌. Bọu ene, i Yehoyada dingangu manga těmbonang nẹ̌bawa si Yehoas sarang istana kụ něngoro si sie kaiang su takhta. Kěbị tau Yehuda mal᷊uasẹ̌. I sire botonge maněmbah si Yehuwa dingangu nawebasẹ̌ bọu i Atalia lai pěnaněmbang su Baal. Kakanoạ bahani bọu i Yehoyada piạ gunane su lawọ taumata.