Jezabel nigiʼdaa mbáa a̱ʼdióo dxáʼgú bi̱ nigumbiʼyuu Atalía ga̱jma̱a̱ ninindxu̱u̱ ikhaa má xóo ru̱dúu̱. Atalía ndiyáa mbáa rey bi̱ xtáa náa Judá. Índo̱ ikhaa nikháñu, a̱ʼdióo nigíʼdu̱u̱ niʼtáñajunʼ. Ga̱jma̱a̱ índo̱ a̱ʼdióo nikháñu, Atalía niguanúu ga̱jma̱a̱ reino ndrígóo Judá. Mu nimbáa xariya kaʼyúʼ, nigíʼ magudíin e̱ji̱i̱n rey ga̱jma̱a̱ xúgínʼ bi̱ kaʼñún mutáñajunʼ. ¡Asndu nigudíin e̱ji̱n xíñíínʼ! Ikha jngó, xúgínʼ namiñun kuyáá.

Jehoiadá bi̱ kayá edxu̱u̱ náa dxajkun, ga̱jma̱a̱ a̱ʼgiu̱u̱ bi̱ mbiʼyuu Jehoseba, nduyáá rí Atalía xtáa raʼni dí ra̱májánʼ wéñuʼ. Asndu migamíi makhañún numuu rí ikhiin nirkaʼwii mbáa aʼdá xíñiiʼ Atalía, mbáa ada̱ bi̱ nigumbiʼyuu Jehoás. Nini mbaja̱a̱ náa templo.

Índo̱ Jehoás nigiʼdoo juwan tsiguuʼ, Jehoiadá nigímbíin mbá xúgínʼ xa̱bu̱ wanuu ga̱jma̱a̱ levitas. Niʼthúún: “Guñewa̱a̱n xkrugua ndrígóo templo. Xúniʼñáʼ rí nimbáa mato̱ʼo̱o̱”. Nda̱wa̱á, Jehoiadá nigrígu corona náa edxu̱u̱ Jehoás mu mani̱ndxu̱u̱ rey náa Judá. Ikhú xa̱bu̱ nindxa̱ʼwa̱: “¡Gaxtáa rey!”.

Reina Atalía niʼdxuun rí xa̱bu̱ kuwa rundxa̱ʼwa̱ ga̱jma̱a̱ ni̱jkha̱ ragáyúu náa templo. Índo̱ ndiʼyoo bi̱ mani̱ndxu̱u̱ rey, ikhú niʼthí: “¡Nandún muniuʼ dí raʼkhí! ¡Nandún muniuʼ dí raʼkhí!”. Xa̱bu̱ guanii nirujtuwiin reina, nigún ku̱ya̱a̱ ga̱jma̱a̱ nixiyáa. Ikhaa tániñuʼ mbá májánʼ xkri̱da náa xúgínʼ xa̱bu̱, ndiéjunʼ gárígá xúgi̱ rá.

Jehoiadá nimbáyúu xuajen mu mambanún gajmiún Jeobá. Ikhú nitháán Dios rí mbuyamajkuíí i̱ndó ikhaa. Jehoiadá niʼni rí muni gámbáa templo ndrígóo Baal ga̱jma̱a̱ muni gámbáa xándú. Nigruigi̱i̱n ndxajkun  ga̱jma̱a̱ levitas mu muñajunʼ náa templo ndrígóo Jeobá mu ma̱ndoo mbuyamajkuíí ikhí mbu̱júu̱ xa̱bu̱. Ma̱ngaa nigruigi̱i̱n bi̱ muyejngoo náa templo mu xáto̱ʼo̱o̱ nimbáa bi̱ naʼni dí ra̱májánʼ. Nda̱wa̱á, Jehoiadá gajmiún xa̱bu̱ guanii nigún ku̱ya̱a̱ Jehoás náa palacio ga̱jma̱a̱ nigíʼ náa trono. Xa̱bu̱ Judá nidxún wéñuʼ. Asndu xúgi̱ rí ma̱ndoo muni ñajunʼ Jeobá, numuu rí ní nda̱wa̱a̱ Atalía bi̱ ra̱májáánʼ ga̱jma̱a̱ nánguá mbuyamajkuíí Baal. Lá naku̱ma̱ʼ rí támiñuu Jehoiadá ráʼ. Lá natayáá rí ga̱jma̱a̱ numuu rúʼko̱ ikhaa nimbáñun mbaʼin xa̱bu̱ ráʼ.