Nanagn’anak’ampela raty fagnahy nanahake aze ka ty Jezebela. I Atalia ty agnara’e. Nanambaly ty mpanjaka i Joda reke. Naho fa nimate ty vali’e le ty ana-dahi’e ty nanjaka. Naho fa nimate ka i ana’ey, le nanao ty vata’e ho mpanjaka i Joda reke. Vinono’e iaby ze ana mpanjaka naho ty ndaty eretserete’e ho mpanjaka, agnisa izay ty zafe’e. Natahotse aze iaby o ndatio.

Fanta i Joiada Mpisorom-bey naho i Joseba vali’e tie raty vata’e ty raha natao i Atalia. Naeta iareo ty Joasy zafe i Atalia ndra tie ho namoea iareo ty fiay iareo izay, le tineza iareo tagnate i tempolỳ ao.

Navory i Joiada iaby o ndaty mpifeheo naho o Levitao, naho fa fito taogne ty Joasy. Le hoe reke: ‘Ambeno’areo ty lala o tempolio tsy hisy hilitse. Nasia’e satro-boninahetse ty loha i Joasy, le ie ty nanjare mpanjaka i Joda. Hoe i vahoakey: ‘Ho lava havelogne abey ty mpanjaka!’

Nimbamy i tempolỳ mbeo malaky ty Atalia naho fa naharey korake. Naho fa nahatrea i mpanjakay reke le nikorake tie: ‘Fanoheragne! Fanoheragne toa!’ Tsinepa i mpifehe rey reke, le nindese iareo niakatse sady vinono iareo. Hatao akore ty raha raty maro fa natao’e o vahoakeo?

Nampanoe i Joiada vava amy i Jehovah o vahoakeo tie Ie raike avao ty hotompoe iareo. Nampandravae i Joiada iareo ty  tempoly i Bala naho ty sampy tao. Nanendre mpisorogne naho Levita hiasa tamy i tempolỳ ao ka reke soa tie mivavake ao indraike o vahoakeo. Nasia’e mpiamben-dalagne ka ty teo, amy izay ze ndaty malio avao ro militse ao. Napetra i Joiada naho i mpifehe rey tamy ty tragnom-panjaka tao ty Joasy, le nipetrake tamy i sezam-panjakay. Nifale ty vahoake ta Joda ao tamy izay. Afake tamy ty fampijalea i Atalia naho ty fivavahagne tamy i Bala iareo naho fa nanompo i Jehovah. Nandrambe soa tamy ty herim-po i Joiada o vahoakeo.