Jezabɛlɛ aki l’ɔna womoto lakawelɛka Ataliya, ɔnɛ laki kɔlɔ oko nyango. Ataliya akatshukana la nkumekanga ka Juda. Etena kakavu omɛnde, ɔnande la pami mbakatatɛ mbolɛ. Koko etena kakavu ɔnande, Ataliya akayaetɛ ndamɛ ɔnɔmbɔdi wa Juda. Ko nde akatatɛ nshila oshiki anto wa l’ɔlɔndji w’owandji, lo ndjaka onto tshɛ lakakoke ndjonga nkumekanga lo dihole diande oyadi ekana ande hita. Onto tshɛ akawokaka wɔma.

Jɛhɔyada laki ɔlɔmbɛdi a laadiko la wadɛnde Jɛhɔsheba wakeyaka dia kɛnɛ kakasalaka Ataliya kaki kɔlɔ efula. Vɔ wakadje nsɛnɔ yawɔ lo waale lo mbishɛ Jɛhɔashi, okana waki Ataliya. Vɔ wakawodia lo tɛmpɛlɔ.

Lam’akakotsha Jɛhɔashi ɛnɔnyi esambele, Jɛhɔyada akatshumanya ewandji wa waoho tshɛ ndo ase Lɛwi ko akawatɛ ate: ‘Nyodihe asoko wa tɛmpɛlɔ ndo tanyetawɔke di’onto ɔmɔtshi mbɔtɔ lɔkɔ.’ Oma laasɔ, Jɛhɔyada aketɛ Jɛhɔyashi nkumekanga ka Juda ndo akawɔlɔtsha dɛmbɔ dia nkoso l’ɔtɛ. Ase Juda wakade ekoko ɔnɛ: ‘Nkumekanga alombe!’

Ataliya nkumekanga ka womoto akoke ekoko wendana la dɛmbɔ dia nkoso ko akalawɔ otsha lo tɛmpɛlɔ. Lam’akandɛnyi nkumekanga k’oyoyo, nde akade ekoko ate: “Wambɔmbɔtwɛ sheke! Wambɔmbɔtwɛ sheke!” Ewandji wa waoho wakande Ataliya, wakawonya oma laasɔ ko wakatowodiaka. Ko kayotota dia shɛngiya ya kɔlɔ yaki la nde lo wodja?

Jɛhɔyada akakimanyiya ase wodja dia mbidja la Jehowa sheke ndo lɔkɔ vɔ wakate dia wayɔtɛmɔlaka paka Jehowa. Jɛhɔyada akanyukola tɛmpɛlɔ ka Baala ndo akodiodia  dikishi bɛtshi bɛtshi. Nde akasɔnɛ ɛlɔmbɛdi ndo ase Lɛwi dia kambaka lo tɛmpɛlɔ di’anto tɔtɛmɔlaka lɛkɔ nto. Nde akakitsha alami w’asoko dia namaka tɛmpɛlɔ diaha onto ɔmɔtshi lele mindo ndjɔtɔ lɔkɔ. Oma laasɔ, Jɛhɔyada kaamɛ la ewandji wa waoho wakatshu la Jɛhɔyashi otsha lo luudu l’owandji ko towahenya lo kiti ka lowandji. Ase Juda wakangɛnangɛna. Vɔ wokoka kambɛ Jehowa aha la Ataliya onto la kɔlɔ monga laawɔ ndo aha la ɔtɛmwɛlɔ wa Baala. Onde wɛ ambɛna woho wele dihonga diaki Jɛhɔyada diakakimanyiya anto efula?