Yezebelu wenga ndi mwana munthukazi zina laki Ataliya yo wenga muheni nge yiyu. Ataliya wangutorana ndi fumu ya charu cha Yuda. Murumu waki wati wafwa, mwana waki wangwamba kuwusa. Mwana waki wati wafwa, Ataliya wangujiŵika kuŵa wakulamuliya wa Yuda. Iyu wanguyesesa kuti wamali mtundu wosi wachifumu mwakubaya weyosi yo watingi wazilamuliyengi m’malu mwaki. Iyu wangubaya so chinanga mbazuku ŵaki anthurumi a mwana waki munthurumi. Ŵanthu wosi amuwopanga.

Wasembi Mura Yehoyada pamoza ndi muwolu waki Yehosheba anguziŵa kuti vo Ataliya wachitanga venga viheni ukongwa. Yiwu anguŵika umoyu wawu pangozi pakubisa muzuku munthurumi waku Ataliya. Zina laki lenga Yoashi. Yiwu amuleliyanga munyumba yakusopiyamu.

Pa nyengu yo Yoashi wenga ndi vyaka 7, Yehoyada wanguwunganisa alongozi a mafuku ndi Alevi ndipu wanguŵakambiya kuti: ‘Muje alonda a visasa va nyumba yakusopiyamu ndipu mungazomerezanga weyosi cha kuseremu.’ Pavuli paki, Yehoyada wanguŵika Yoashi kuja fumu ya Yuda ndipu wangumuvwalika chisoti chachifumu. Ŵanthu aku Yuda angudaniliza kuti: ‘Fumu yije ndi umoyu utali!’

Fumukazi Ataliya yinguvwa vo ŵanthu adanirizanga ndipu yingutchimbiliya kunyumba yakusopiyamu. Yati yawona fumu yasonu, yingudaniriza kuti: “Chiŵembu! Chiŵembu!” Alongozgi a mafuku anguko fumukazi yiheni yeniyi ndikuluta nayu kutali kuchiyibaya. Kumbi ŵanthu anguchita wuli ndi vinthu viheni vo fumukazi yeniyi yinguchitiya mtundu wenuwu?

Yehoyada wanguwovya mtundu wenuwu kuchita phanganu ndi Yehova ndipu yiwu angulayizga kuti asopengi Yehova pe. Yehoyada wanguŵakambiya kuti agumuwi nyumba yakusopiyamu Bala ndi kuphwanya angoza. Iyu  wangusankha asembi ndi Alevi kuti agwirengi ntchitu pa nyumba yakusopiyamu ndi chilatu chakuti ŵanthu ayambi so kusopiyamu. Iyu wanguŵika alonda pa geti kuti alondengi nyumba yakusopiyamu ndi chilatu chakuti munthu weyosi wakufipisika waleki kuseremu. Pavuli paki, Yehoyada ndi alongozgi anguluta ndi Yoashi ku nyumba yachifumu ndipu angumuŵika pa mpandu wachifumu. Ŵanthu a ku Yuda angukondwa. Yiwu atingi ateŵetiyengi Yehova ndipu pakumaliya paki atingi afwatukengi ku fumukazi yiheni Ataliya kweniso kukusopa Bala. Kumbi uwona mo kuleka kuchita mantha kwaku Yehoyada, kunguwovye ŵanthu anandi?