Jezebbeli wakali amwana musimbi wakali kutegwa Ataliya alimwi wakali kuchita zintu zibi mbuli banyina. Ataliya wakakwetwe amwaami wachisi chaJuda. Mulumaakwe naakafwa, mwanaakwe wakaba mwaami. Pesi mwanaakwe naakafwa, Ataliya wakalibikka kuba mwaami wachisi chaJuda. Alubo, wakeezya kujaya bantu boonse bakali muluzubo lwabwaami, nikuba bazukulu bakwe wakabajaya. Bantu boonse bakali kumuyoowa.

Mupayizi Mupati, Jehoyada amukayintu wakwe Jehosebba bakabona kuti zyakali kuchitwa aAtaliya tazili kabotu pe. Bakalinjizya mumapenzi kuchitila kuti basise muzukulu waAtaliya wakali kutegwa Jehowasi, wakachili mwana. Wakakomena kakkala mutempele.

Chiindi Jehowasi naakaba aminyaka iili 7, Jehoyada wakabungania baalumi bapati bamumuunzi amaLevi mpawo wakababuzya kuti: ‘Amulinde mumilyango yatempele alimwi mutazumizyi muntu kuti anjile.’ Kuzwa waawo, Jehoyada wakachita kuti Jehowasi abe mwaami alimwi wakamusamika musini wabwaami mumutwe. Bantu bamuchisi chaJuda bakoompolola kabati: ‘Mwaami apone!’

Mwaami Mukayintu, Ataliya naakamvwa koompolola kwabantu, wakachijaana kaya mutempele. Naakabona mwaami mupya wakakwiila kati: “Ndaabwa! Ndaabwa!” Baalumi bapati bamumuunzi bakamujata mukayintu ooyu, bamubweza alimwi bakamujaya. Pesi zintu zibi nzyakachita muchisi zyakachitwa biyeni?

Jehoyada wakagwasya bantu kuti bachite chizuminano aJehova alimwi bantu bakasyomezya kukomba Jehova luzutu. Jehoyada wakabuzya bantu kuti bamwaye matempele aBbaala akuti banyonyoone zikozyano zyabaleza bakubeja. Wakasala bapayizi amaLevi kuti  kababeleka mutempele kuchitila kuti bantu bakakombele nkuko lubo. Alubo, wakasala balindi kuti kabalinda amilyango yatempele kuchitila kuti kutanjili muntu wakasofweede. Kuzwa waawo, Jehoyada abaalumi bapati bamumuunzi bakatola Jehowasi kung’anda yabwaami akumukkazika achuuno chabwaami. Bantu bamuchisi chaJuda bakabotelwa. Bakakonzya kukomba Jehova, bakaangunuka kuzwa kuli Ataliya wakali kuchita zintu zibi alimwi bakaleka kukomba Bbaala. Tazitondeezyi na kuti kutayoowa kwaJehoyada kwakagwasya bantu biingi?