Jezebheli i wa hi ni n’wana wa ku hi Ataliya, loyi yenawu a nga hi ni mahanyela yo biha ku fana ni mamani wakwe. Ataliya i wa hi sati wa hosi ya Judha. A cikhati leci a nuna wakwe a ngafa, a n’wana wakwe i no sangula ku fuma. Kanilezvi, a cikhati leci a n’wana wakwe a ngafa, Ataliya i no ti maha hosi a sangula ku fumela tiko ga Judha. I no zama ku daya vontlhe va humako lixakeni la wuhosi. I zamile ku daya vontlhe va nga wa ta tshuka va mu tekela wuhosi, a ku patsa ni zukulu wakwe. Vontlhe va wa mu chava.

Mupristi wa Hombe Jehoyadha ni sati wakwe Jehoxebha, va wa zvi tiva ku lezvi Ataliya a nga zvi maha zvi wa bihile nguvhu. Va no veka wutomi gabye mhangweni, va fihla Joaxi — a mun’we wa vazukulu va Ataliya. Va no ya mu wundla lomu tempeleni.

A cikhati leci Joaxi a nga hi ni 7 wa malembe, Jehoyadha i no tlhanganisa tihosana tontlhe ni vaLevhi a va byela lezvi: ‘Nyimani laha tinyangweni ta tempeli, mu nga tsiki munhu a nghena’. Jehoyadha i no yimisa Joaxi kota hosi ya Judha a tlhela a mu bohisa cihuku ca wuhosi. A vanhu va ka Judha va no huwelela vaku: ‘A hosi a yi hanye masiku yo tala’!

Hosi Ataliya i nozwa guwa ga vanhu a tekela ku tsutsuma aya tempeleni. A cikhati leci a nga wona lezvaku ku yimisilwe hosi ya yiswa, i no sangula ku banguleka, aku: ‘Mo ndzi jikela! Mo ndzi jikela’! A tihosana ti no khoma Ataliya, ti mu humesa handle ti mu daya. Hambulezvo, ahati a kucetelo wo biha lowu a nga byalile lomu tikweni ke?

Jehoyadha i no vhuna vanhu lezvaku va maha civumelwano na Jehovha, va mu tsumbisa ku va ta khozela yena yece. Jehoyadha i no byela vanhu lezvaku va khungumula tempeli ya Bhaali va tlhela va fayetela zvifananiso zviku bhi. I no yimisa vapristi ni vaLevhi lezvaku va tira  lomu tempeleni kasi a vanhu va vhuxetela ku khozela ka yona. I no hlawula vanhu vo kari lezvaku va wonelela tinyangwa ta tempeli kasi a vanhu va ku biha va nga ngheni. Hi kulandzela, Jehoyadha ni tihosana va no teka Joaxi va famba naye le ndlwini ya wuhosi va ya mu tshamisa laha citshanwini ca wuhosi. A vanhu va le Judha va no tsaka nguvhu. Ka cikhati leco, va wa tlhatlhisilwe. Va wa nga ha kucetelwi zvo biha hi Ataliya, a hosi yo biha, ne va wa nga ha khozeli Bhaali. Va wa khozela Jehovha. A vanhu va vhunekile nguvhu hi lezvi Jehoyadha a nga kombisa kutiya-hlana, a hi zvona?