Yezeberi akaba aine muhara we arukwetwa Ataliya, nauwe akaba ali mubi muno nka nyina. Ataliya akaba aswirwe omukama wa Yuda. Iba obuyafiire, mutabani we akatandika kulema. Baitu mutabani we obuyafiire, Ataliya akefoora omulemi wa Yuda. Hanyuma, akatandika kwita oruzaaro rw’obukama hamu n’abaijukuru be boona abakaba basemeriire kulema omu kiikaro kye. Buli muntu akaba namutiina.

Yehoyada nyakatagara omukuru hamu na mukazi we Yehoseba bakaba bakimanyire ngu Ataliya eky’akaba nakora kikaba kibi muno. Bakata obwomeezi bwabo omu kabi obu baserekere omu h’abaijukuru ba Ataliya arukwetwa Yoasi ow’akaba ali nkerembe kandi bamukuliza omu Yekaru.

Yoasi obwakaba aine emyaka musanju, Yehoyada akasorooza abakuru boona hamu n’Abalevi y’abagambira ati: ‘Muliinde enyigi za yekaru kandi mutaikiriza omuntu wena kutahamu.’ Nukwo Yehoyada yafoora Yoasi omukama wa Yuda kandi yamujweka ekondo y’obukama ha mutwe gwe. Abantu b’omu Yuda bakaimukya amaraka nibagamba: ‘Hangaara omukama!’

Omugo Ataliya obu yahuliire amaraka g’abantu, akarahuka yagenda ha yekaru. Obuyaboine omukama omuhyaka, akarra n’agamba ati: “Obwemi! Obwemi!” Abakuru bakamukwata bamutwara bamwita. Baitu kandi kiki ekyakuhikire ha ngeso embi ezaleserweho obukama bwe obubi?

Yehoyada akakonyera abantu ba Yuda kukora endagaano na Yahwe kandi baraganiza kuramya Yahwe wenka. Yehoyada akabaragira bahwerekereze yekaru ya Baali hamu  n’ebisisani bye. Kandi akataho banyakatagara hamu n’Abalevi ab’okuheereza omu yekaru nukwo abantu bongere kugiramizaamu. Akataho abantu kuliinda yekaru n’okutanga abantu abatasemeriire kugitahamu. Hanyuma Yehoyada hamu n’abakuru bakatwara Yoasi omu kikaali bamwikaliza ha ntebe y’obukama. Abantu ba Yuda bakasemererwa muno habwokuba bakaba bagarukiremu kutunga omugisa gw’okuheereza Yahwe hataroho Ataliya omugo omubi hamu n’okuramya okwa Baali. Norora omulingo obumanzi bwa Yehoyada bwakonyiire abantu baingi?