Yezebeli wakaŵa na mwana mwanakazi, zina lake Ataliya. Ataliya nayo wakaŵa muheni chomene nga mbamama ŵake. Ataliya wakatengwa kwa fumu ya Yuda. Mfumu wake wati wafwa, mwana wake mwanalume ndiyo wakaŵa fumu. Kweni mwana wake wati wafwa, Ataliya wakajizgora yekha kuŵa fumu ya Yuda. Ndipo wakamba kukoma banja lose lachifumu. Wakakoma waliyose uyo wangaŵa fumu m’malo mwa iyo. Wakakoma na ŵazukuru ŵake wuwo. Waliyose wakamuwopanga Ataliya.

Wasembe mulara Yehoyada na muwoli wake Yehoshabeti, ŵakamanya kuti Ataliya wakuchita vinthu viheni chomene. Iwo ŵakaŵika umoyo wawo pangozi na kubisa muzukuru wa Ataliya kuti waleke kukomeka, zina lake Yehowashi. Ŵakamubisa mu tempile.

Apo Yehowashi wakaŵa na vyaka 7, Yehoyada wakawunganya ŵalongozgi ŵa nyumba yachifumu na Ŵalevi na kuŵaphalira kuti: ‘Mulindenge pa milyango ya tempile ndipo mungazomerezganga waliyose yayi kunjira mukati.’ Yehoyada wakimika Yehowashi kuŵa fumu ya Yuda na kumuvwalika chisoti chachifumu. Ŵanthu ŵa mu Yuda ŵakachemerezga kuti: ‘Fumu yiŵe na umoyo utali!’

Fumukazi Ataliya yikapulika ŵanthu ŵakuchemerezga ndipo yikachimbilira ku tempile. Yikati yawona fumu yasono, yikachemerezga kuti: “Chiŵembu! Chiŵembu!” Ŵalongozgi ŵa nyumba yachifumu ŵakayikora fumukazi yiheni yira, na kuluta nayo kumphepete, ŵakayikoma. Kweni wuli za vinthu viheni ivyo yikachitira mtundu wura?

Yehoyada wakawovwira mtundu wose kuti upange phangano na Yehova, ndipo ŵakalayizga kuti ŵasopenge Yehova pera. Yehoyada wakatuma ŵanthu kuti ŵawiskire pasi tempile la Baala na kuparanya vikozgo vyose. Wakasankha ŵasembe na Ŵalevi kuti ŵateŵeterenge pa tempile kuti ŵanthu ŵambeso kusoperapo Yehova. Wakasankha ŵalinda kuti ŵalindenge tempile kuti wakufipirwa waliyose waleke kunjiramo. Yehoyada na ŵalongozgi ŵa nyumba yachifumu ŵakatora Yehowashi na kuluta nayo ku nyumba yachifumu na kumuŵika pa mpando wachifumu. Ŵanthu ŵa mu Yuda ŵakakondwa. Ŵakamba kuteŵetera Yehova mwakufwatuka sono, kwambura kusuzgika na Ataliya kweniso kuleka kusopa Baala. Kasi wawona umo chikanga cha Yehoyada chikawovwilira ŵanthu ŵanandi?