Иезавел боду ышкаш каржы-дошкун Гофолия дээр уруглуг чораан. Гофолияның ашаа Иуданың хааны турган. Ол чок апаарга, ооң оглу хаан апарган. А кажан оглу чок апаарга, Гофолия кадын апарган. Ооң эргезин кым-даа хунаавас кылдыр, шупту салгакчыларын, безин уйнуктарын, ол өлүрүп каапкан.

Дээди бараалгакчы Иодай болгаш ооң кадайы Иосавет Гофолияны каржы деп билир чораан. Ынчалза-даа өлүрүнден-даа кортпайн, олар Гофолияның уйнуу Иоасты чажырыпкан. Олар ону Бурганның өргээзинге кижизидип өстүрүп турган.

Иоас чеди харлыг апаарга, хаанның шерииниң баштыңчыларын болгаш левиттерни Иодай чыып алган. Иодай оларга: «Өргээниң хаалгазын кадарыңар, ынаар кымны-даа киирбеңер» — дээн. Оон Иодай Иоасты хаан деп чарлааш, аңаа оваадайны кедирип каан. Чон: «Хаан делгерезин!» — деп алгыржып турган.

Гофолия кадын чоннуң алгыржып турарын дыңнааш, өргээже халып чеде берген. Ол чаа хаанны көрүп кааш: «Сүлчээ! Сүлчээ!» — деп алгырыпкан. Шериг баштыңчылары ол каржы кадынны тудуп алгаш, өлүрүп каапкан. Кадынның багай херектер кылып өөредип каапканы чонну канчап катап кижизидерил?

Иодай чонга Иегова-биле керээни чарып алырынга дузалаан. Ынчан шупту улус чүгле Иегова Бурганга бараалгаарын аазаан. Иодай оларга Ваалдың бажыңын болгаш шупту дүрзү-бурганнарын узуткап кааптарын айыткан. Чон катап Иеговага мөгеер аргалыг боор кылдыр, ол Бурганның өргээзинге бараалгакчыларны болгаш левиттерни томуйлап каан. Оон аңгыда, ол Иегованың караанга  кандыг-бир чылдагаан-биле арыг эвес деп санаттынып турар кижи өргээже кирип шыдавас кылдыр, хаалга чанынга таңныылдарны тургузуп каан. Соонда Иодай болгаш шупту баштыңнар Иоасты ордуже эккелгеш, ону хаанның дүжүлгезинге олуртуп каан. Чон Иеговага катап бараалгап эгелээни дээш амырап турганнар. Олар каржы Гофолияның салдарындан хосталып алгаш, Ваалга чүдүвес апарганнар. Иодайның эрес-дидиминиң ачызында кижилер Иеговаже катап эглип келген деп көрдүвүс.