Te Jezabel ay jtul yantsil-al te Atalía sbiil, kʼax chopol-euk jich bitʼil te smeʼe. Te Atalía nujpun sok te ajwalil yuʼun Judá. Kʼalal laj te smamlale, jaʼ och ta ajwalil te skerem-ale. Te kʼalal laj te skerem-ale, te Atalía jaʼ la swentain jilel te Judá. Swenta maʼyuk machʼa ya xpojbot yuʼun te wentainel, la smiltiklambey snichʼnab te ajwalil sok spisil te machʼatik ya xjuʼ x-ochik ta ajwalil-euke. ¡Jaʼnix jich la smiltiklan te smamtake! Jaʼ yuʼun la xiʼik te Atalía.

Te mukʼul sacerdote Joiada (Jehoiadá) sok te yinam te Josaba (Jehoseba) sbiile, snaʼojik te kʼax chopol te bin yak ta spasel-a te Atalía. Jich yuʼun la yakʼ ta wokol skuxlejalik kʼalal la snakʼbeyik jtul smam te Atalía, jtul alal te Joás (Jehoás) sbiile. La schʼitesik ta yutil templo swenta maʼyuk machʼa ya yil-a.

Kʼalal jukeb yaʼbilal-a te Joás, te Joiada la stsob spisil te kapitanetik sok te levitaetik. La yaltiklanbey: “Kanantayaik te puertaetik yuʼun te templo. Mame ayuk machʼa ya awakʼik ochel”. Ta patil, te Joiada la skajanbey corona ta sjol te Joás swenta jaʼ ya x-och ta ajwalil yuʼun Judá. Jich yuʼun te ants winiketik yuʼun Judá kajik ta aw: “¡Viva te ajwalil!”.

Kʼalal la yaʼiy stojol te Atalía te yakik ta aw te ants winiketike animalnax bajtʼ ta templo. Kʼalal la yil te yachʼil ajwalil, tulan awun: “¡J-akʼaw ta kʼabal! ¡J-akʼaw ta kʼabal!”. Te kapitanetik la stsakik te chopol ajwalil ants, la yikʼik bael sok la smilik. Te antse, chopol stalel la yakʼ ta ilel ta stojol te nasione. ¿Bin ya xkʼotix ta pasel-a?

Te Joiada la skoltay te nasion ta spasel jun chapbilkʼop sok te Jehová. Ta chapbilkʼop-abi la yalbeyik ta jamal Dios te jaʼnax ya yichʼik ta mukʼe. Te Joiada la yal ta mantal te ya yichʼ jinel te templo yuʼun Baal sok te ya  swuytiklanik te lokʼombaetik. La yakʼ ta aʼtel sacerdoteetik sok levitaetik ta templo swenta te ants winiketik tey ya yichʼik ta mukʼ yan buelta-a te Jehová. Soknix la yakʼ jkananetik ta yilel te templo swenta ma x-och jtuluk te machʼa boloben skʼoplale. Ta patil, te Joiada sok te kapitanetik la yikʼik bael te Joás ta mukʼul na sok la sjujkanik ta mukʼul juktajibal. Te ants winiketik yuʼun Judá tseʼelnax yoʼtanik yuʼun. Ya xjuʼ x-abatinikix ta stojol te Jehová, melel libre ayikix ta stojol te Atalía sok ta schʼuunel te Baal. ¿Yabal akuy te maba xiw te Joiadae? ¿Yabal awil te jaʼ ta skaj te la skoltay bayal ta tul ants winiketike?