Isevele wa kuata omõla umue ukãi o tukuiwa hati, Ataliya, okuti wa kalavo ondingaĩvi nda inaye. Ataliya wa kueliwile losoma yimue yo ko Yuda. Eci ulume waye a fa, omõlaye ulume wa fetika oku viala. Pole, eci omõlaye ulume a fa, Ataliya wa li lingisa eye muẽle ombiali yofeka yo Yuda. Kuenje wa seteka oku kundula vosi vakuambuto yusoma, poku ponda omunu wosi wa laikele oku viala okuti eye hayeko toke muẽle olonekulu viaye. Omanu vosi va kuatele usumba laye.

Ocitunda Cinene Yehoyada kumue lukãi waye Yehoseva, va kũlĩhĩle okuti eci Ataliya a kala oku linga ka ca sungulukile. Ovo va kapa kohele omuenyo wavo oco va soleke umue pokati kolonekulu via Ataliya okuti oñaña yimue yi tukuiwa hati, Yoasi. Ovo vo wambata toke konembele.

Eci Yoasi a kuata anyamo epanduvali, Yehoyada wongolola asongui vosi kuenda va Lewi kuenje wa va sapuila hati: ‘Lavi olombundi vionembele kuenda ko ka eceleli okuti umue iñila.’ Kuenje Yehoyada wa vialeka Yoasi oco a linge osoma yo Yuda kuenda wa kapa ekolowa limue kutue waye. Omanu vo ko Yuda va kaluka lolukandi vati: ‘Soma a kale lomuenyo!’

Nasoma Ataliya wa yeva onjuela yomanu kuenje wa lupukila konembele. Eci eye a mola osoma yokaliye wa kaluka hati: “Usuanji! Usuanji!” Asongui va kuata nasoma ondingaĩvi, vo wambata posamua kuenje vo ponda. Pole, nye ci popiwa catiamẽla kongangu yĩvi a sila omanu vofeka?

Yehoyada wa kuatisa omanu oku linga ocisila cimue okuti va likuminya oku fendela lika Yehova. Yehoyada wa tuma oku lundula onembele ya Baale kuenda oku nyanyola oviñumañuma viaye. Eye wa nõla ovitunda kuenda va  Lewi oco va talavaye vonembele okuti omanu va pondola oku fendelela vali vonembele yaco. Eye wa nõla vakualombundi oco va lave onembele okuti lomue omunu wa vĩha o pondola oku iñilamo. Noke Yehoyada kuenda asongui vambata Yoasi kelombe kuenje vo tumbika kocalo. Omanu vo ko Yuda va kuata esanju. Ovo kaliye va poduile oku vumba Yehova, momo va yovuiwa kondingaĩvi Ataliya kuenda kefendelo lia Baale. O tẽla hẽ oku limbuka ndomo ekolelo lia Yehoyada lia kuatisa omanu valua?