Isebele o vha e na ṅwana wa musidzana ane a pfi Athalia, we a vha e muvhi u fana na mme awe. Athalia o vha o vhingwa nga khosi ya Yuda. Musi munna wawe a tshi fa, ṅwana wawe wa mutukana a thoma u vhusa. Fhedzi musi ṅwana wawe a tshi fa, Athalia o ḓi vhea uri a vhe muvhusi wa Yuda. Nga murahu a lingedza u fhelisa mutevhe woṱhe wa vhuhosini, a vhulaha naho e nnyi we a vha a tshi nga mu dzhiela vhuhosi, u katela na vhaḓuhulu vhawe. Vhathu vhoṱhe vho vha vha tshi mu ofha.

Tshifhe Muhulu Yoyada na mufumakadzi wawe, Yosabathi, vho vhona uri zwine Athalia a khou zwi ita ndi zwivhi vhukuma. Vha vhea vhutshilo havho khomboni nga u dzumba muḓuhulu wa Athalia, ane a pfi Yoasi. Vha mu alusa thembeleni.

Musi Yoasi e na miṅwaha ya sumbe, Yoyada a kuvhanganya vharangaphanḓa vhoṱhe na vhotshifhe nahone a vha vhudza a ri: ‘Lindani miṋango yoṱhe ya thembele, nahone ni songo tendela muthu a tshi dzhena.’ Nga murahu Yoyada a vhea Yoasi a vha khosi ya Yuda nahone a vhea khare kha ṱhoho yawe. Vhathu vha Yuda vha vhidzelela vha ri: ‘Khosi nga i lalame!’

Mufumakadzi Athalia a pfa vhathu vha tshi khou vhidzelela nahone a gidimela thembeleni. Musi a tshi vhona khosi ntswa, a vhidzelela a ri: “Ndi tshimbevha! Ndi tshimbevha!” Vharangaphanḓa vha fara onoyo mufumakadzi muvhi, vha ṱuwa nae nahone vha mu vhulaha. Fhedzi hu pfi mini nga ha ṱhuṱhuwedzo mmbi ye a vha e nayo kha lushaka?

Yoyada o thusa lushaka u ita mulanga na Yehova he vha fulufhedzisa uri vha ḓo rabela Ene fhedzi. Yoyada o ita uri vha thuthe thembele ya Baali na u pwashekanya midzimu ya zwifanyiso.  A vhea vhotshifhe na Vhalevi uri vha shume thembeleni u itela uri vhathu vha dovhe u rabela henefho. A ṋea vhalindi vha miṋango mushumo wa u linda thembele u itela uri hu songo dzhena vhathu vha songo kunaho. Nga murahu Yoyada na vharangaphanḓa vha isa Yoasi pfamoni nahone vha mu vhea kha tshidulo tsha vhuhosi. Vhathu vha Yuda vha takala. Zwino vho vha vha tshi kona u shumela Yehova hu si tsheena mufumakadzi muvhi Athalia na vharabeli vha Baali. Naa ni a kona u vhona uri tshivhindi tsha Yoyada tsho thusa hani vhathu vhanzhi?