Elzzaabeeli naˈiyaa Ataala ba aayeedan iita. Ataala Yihudaa kawuwaa gelaasu. I azinay hayqqin, i naˈay haariyoogaa doommiis. SHin i naˈay hayqqin, Ataala Yihudan bana kawo oottaasu. He wode a ba naˈaa naata gujjin, ba sohuwan kawotana danddayiya kawo zare ubbaa xayssanawu malaasu. Asa ubbay o yayyiis.

Qeese Ubbatu Halaqay Yoodaaheenne a machiyaa Yihoshebaaˈa, Ataala oottiyoobay keehi iitaba gidiyoogaa eroosona. Eti bantta shemppuwaa shenehoo giidi Ataali naˈaa naˈaa, Yoˈaasha giyo guutta naˈaa qottidosona. Eti a beeta maqidasiyan dichidosona.

Yoˈaashawu layttay laappuna gidin, Yoodaahee halaqatunne Leewatu ubbaassi, ‘Beeta maqidasiyaa penggeta naagite; oonanne gelissoppite’ yaagiis. Yaagidi Yoodaahee Yoˈaasha Yihudaa kawo ootti sunttidi, a huuphiyan kallachaa wottiis. Yihudaa asay, ‘Kawoy shemppo gamˈˈo!’ yaagiis.

Kawiyaa Ataala asaa wocamaa siyada eesuwan beeta maqidasiyaa baasu. A sunttettida kawuwaa beˈada, ‘Hagee maqqo! Hagee maqqo!’ yaagaasu. Halaqati iita kawiyo oyqqi kare kessidi, woridosona. Gidoppe attin, a oottidobay asaa bolli kaalettido iitabay shin?

Asay Yihoowaara maacettana mala Yoodaahee asaa maaddiis; eti Yihoowa xallawu goynnanawu qaalaa gelidosona. I asay Baˈaala eeqa keettaa qolanaadaaninne misileta mentterettanaadan oottiis. Asay zaarettidi goynnana mala qeesetinne Leewati beeta maqidasiyan oottanaadan i sunttiis. Geeshsha gidenna uri beeta  maqidasiyaa gelenna mala penggiyaa naagiyaageeta wottiis. He wode Yoodaaheenne halaqati Yoˈaasha kawo keetti efiidi araatan utissidosona. Yihudaa asay ufayttiis. Eti wurssettan iita Ataalippenne Baˈaala goynuwaappe laˈa kiyidi Yihoowawu haggaazana danddayoosona. Yoodaahee xala gididoogee daro asaa waati maaddidaakko akeekadii?