Hi Jesebel may anak nga an ngaran Atalia, nga maraot pariho ha iya. Hi Atalia nagin asawa han hadi han Juda. Kamatay han iya bana, an iya anak an naghadi. Pero kamatay han iya anak, iya ginhimo an iya kalugaringon nga magmarando han Juda. Tapos, nangalimbasog hiya pagpoo han hadianon nga tulin. Iya ginpapatay an bisan hin-o nga puydi magin hadi, bisan an iya mismo mga apo. Ngatanan nahadlok ha iya.

An hitaas nga saserdote nga hi Jehoyada ngan an iya asawa nga hi Jehoseba maaram nga maraot gud an ginbibinuhat ni Atalia. Iginbutang nira ha peligro an ira kinabuhi basi tagoon an usa nga apo ni Atalia, an minasus-an nga hi Jehoas. Ira hiya ginpadaku ha templo.

Han syete anyos hi Jehoas, gintirok ni Jehoyada an ngatanan nga lider ngan mga Levita ngan ginsidngan hira: ‘Bantayi niyo an mga purtahan han templo ngan ayaw pasudla an bisan hin-o.’ Katapos, ginhimo ni Jehoyada hi Jehoas nga hadi han Juda ngan ginkoronahan hiya. An katawohan han Juda nagsinggit: ‘Mabuhi an hadi!’

Hinbatian ni Rayna Atalia an aringasa han mga tawo ngan nagdagmit hiya pagkadto ha templo. Han nakita niya an bag-o nga hadi, nagsinggit hiya: “Pagkunsabo! Pagkunsabo!” Gindakop han mga lider inin maraot nga rayna, iginpahirayo ha templo, ngan ginpatay. Pero paonan-o daw la mawawara ha nasud an iya maraot nga impluwensya?

Ginbuligan ni Jehoyada an nasud nga maghimo hin kasabotan kan Jehova, diin nagsaad hira nga hi Jehova la an ira sisingbahon. Nagsugo hiya nga bungkagon an templo ni Baal ngan dugmukon an mga dios-dios. Iya igintoka an mga saserdote ngan an mga Levita nga magtrabaho ha templo basi an katawohan makagsingba utro  didto. Nagtoka hiya hin mga magbarantay ha templo basi waray makasulod nga mahugaw. Katapos, hi Jehoas gindara ni Jehoyada ngan han mga lider ngadto ha palasyo ngan ginpalingkod ha trono. Nagkalipay an katawohan han Juda. Makakagsingba na gihap hira kan Jehova kay waray na an maraot nga hi Atalia ngan an pagsingba kan Baal. Nakita mo ba kon paonan-o an kaisog ni Jehoyada nakabulig ha damu nga tawo?