Yesebele jwakwete mwanace jwamkongwe lina lyakwe Ataliya. Jwalakwe jwatendaga yakusakala mpela mamagwe. Ataliya jwalombedwe ni mwenye jwa ku Yuda. Ŵamkwakwe paŵawile, mwanagwe jwamlume jwatandite kulamulila. Nambo paŵawilesoni mwanagweju, Ataliya jwaliŵisile kuŵa mwenye jwa Ayuda. Kaneko jwalakwe jwawulagaga ŵandu ŵaŵasosekwaga kwinjila ucimwene, kupwatikapo yisukulu yakwe. Jwalijose ŵamjokopaga Ataliya.

Jwamkulungwa jwa Ŵambopesi Yehoyada, yalumo ni ŵamkwakwe ŵaŵaliji Yehoseba, ŵamanyililaga kuti yaŵatendega Ataliya yaliji yakusakala mnope. Jemanjaji ŵaŵisile umi wawo pangosi mwakukasisa kamwanace kakaliji cisukulu ca Ataliya lina lyakwe Yehowasi. Mwanaceju ŵamsungaga kunyumba jakulambilila.

Yehowasi paŵakwete yaka 7, Yehoyada jwasongenye acimlongola ŵa ngosyo soni Alefi ni jwatite, ‘Alondeleje milango ja nyumba jakulambilila soni akakunda jwalijose kwinjila.’ Kaneko Yehoyada ŵam’ŵisile Yehowasi kuŵa mwenye jwa Ayuda soni ŵam’wecice cisoti ca ucimwene. Ŵandu ŵa ku Yuda ŵagumisile mwakusangalala kuti, ‘Akole umi welewu mwenye!’

Mwenye jwacikongwe Ataliya pajwapikene masegwego jwawutucile ku nyumba jakulambililajo. Jwalakwe ali am’weni mwenye jwasambanojo ŵagumisile kuti, ‘Anjimucile! Anjimucile!’ Acimlongolawo ŵajikamwile mwenye jacikongwe jakusakalajo ni kuja kukujiwulaga. Nambi uli pakwamba ya yakusakala yaŵatendaga ŵanduwo ligongo lya jwalakwe?

Yehoyada ŵawukamucisye mtunduwo kutenda cilangano ni Yehofa cakuti cacimlambilaga jwalakwe jika. Yehoyada ŵagwisisye nyumba jaŵalambililaga Baala soni ŵakasenye milungu jawo. Jwalakwe ŵasagwile ŵambopesi soni  Alefi kuti akamuleje masengo panyumba jakulambilila, kuti ŵandu akalambilejesoni kweleko. Jwalakwe ŵapelesoni masengo alonda ŵa pa yipata kuti alondeleje nyumba jakulambililajo kuti ŵandu ŵangaswejela akajinjilamo. Kaneko Yehoyada yalumo ni acimlongola ŵa ngosyo, ŵamjigele Yehowasi kwawula najo kunyumba ja ucimwene kuti akatande kulamulila mpela mwenye. Ŵandu ŵa ku Yuda ŵasangalele. Pambesi pakwe jemanjaji ŵagopwece ku yakusakala yaŵatendaga Ataliya soni ŵalesile kulambila Baala, ni ŵatumicilaga Yehofa mwagopoka. Ana mkuyiwona kuti kulimba mtima kwa Yehoyada kwakamucisye ŵandu ŵajinji?