Isabeli wuba mwana baba tedilanga Atalia. Mwana beni wukwela ayi ntinu Yuda ayi wuba vanganga mambu mambi buka mam’andi. Bo ntinu beni kafwa, mwan’andi wuvingana va luyalu. Angi bo mwana beni mvandi kafwa, Atalia wu yikitula nafeka ntinu wu Yuda. Nandi kasa tomba ko batu boso baba nswa bavingana va luyalu, buawu kaba vondila. Wuvonda mvandi batekulu bandi. Diawu batu boso baba kumwenanga beni boma.

Yoyada Nganga Nzambi yi Nkulutu ayi nkazi’andi Yoseba bazaba mambu moso mambi Atalia kaba vanga, bawu batula luzingu luawu va kingela bo babonga wumweka mu batekolo ba Atalia baba tedilanga Yoasi ayi bantinisa ku nzo yinlongo yi Yave mwingi kayonzukila kuna.

Bo mwana beni kaba sambwadi di mimvu, Yoyada wutumisa bakulutu boso ayi zi Levita, bosi wubakamba: ‘Kalanu va mwelu wu nzo yinlongo ayi lulendi bika ko ni mutu wumweka kakota.’ Yoyada wubyeka Yoasi ntinu wu Yuda ayi wuntula koloa ku ntu. Ayi dikanda dyoso di basi Yuda batona losuka: ‘Bika ntinu ka zinga!, Bika ntinu ka zinga!’

Atalia ntinu wu nkyeto bo kayuwa batu baba losuka ku nzo yinlongo ayi bo kamona ntinu wumona babyeka, nandi wutona losuka: ‘Bama kukwendila manenga!, Bama kukwendila manenga!’ Zi mfumu ziba vana, bankanga ayi bannata ku nganda divula ayi bamvonda. Angi mambu mawombo mambi kabika mu luyalu lwandi maba vukumuna dikanda dyoso di Yuda. Mbi Yoyada kabina vanga?

Yoyada ayi dikanda dyoso bakanikisa kubwomgimina to Yave. Bawu batulula zinzo zyoso baba sambilanga Bali, bitumba ayi bisyelo byandi. Bosi Yoyada wusola zinganga zi Nzambi, zi Levita mo basala ku nzo yinlongo yi Yave. Ayi dikanda dyoso divutuka kusambila  Yave mu phila yi sulama. Yoyada ayi bankaka banata Yoasi ku khati nzo ayi bamvwandisa va kikundu ki ntinu. Dikanda dyoso di Yuda di yangalala beni, kibila vasa bwe ba ko ni Atalia, ni bisyelo bi Bali mwingi baba tula kikaku mu kutumamana ayi kubwongimina Yave Nzambi. Ngyewu bemona phila mbi kibakala ki Yoyada kisadisila batu bawombo?