Jezabeleʼ anchaj juntúul u hija tu kʼaabaʼtaj Atalía, letiʼeʼ jach kʼasaʼan jeʼex u maamaeʼ. Atalíaeʼ tsʼoʼok u beel yéetel u reyil Judá. Le ka kíim le reyoʼ, u hijo káaj u reinar. Le ka kíim xan u hijoeʼ, Atalía káaj u reinar Judá. Utiaʼal maʼ u xuʼulul u reinareʼ, taakchaj u kíimsik tuláakal u paalaloʼob le reyoʼ bey xan jeʼel máaxak ka taakchajak u reinar tu lugar letiʼeʼ. ¡Kʼuch tak u kíims u yáabiloʼob! Le oʼolal sajak kaʼach tuláakal máak tiʼ.

Jehoiadá, u nojchil le sacerdoteʼoboʼ, yéetel Jehoseba, u yataneʼ u yojloʼob jach maʼ maʼalob le baʼax táan u beetik Atalíaoʼ. Le oʼolaleʼ kex jeʼel tak u kíimsaʼaloʼobeʼ tu taʼakajoʼob juntúul tiʼ u yáabiloʼob Atalía, u kʼaabaʼ le chaambalaʼ Jehoás. Letiʼeʼ tiʼ nojochkíintaʼab teʼ templooʼ.

Le yaan siete años tiʼ Jehoasoʼ, Jehoiadaeʼ tu muchʼkíintaj tuláakal u nuuktakiloʼob le máaxoʼob ku kananoʼoboʼ bey xan le levitaʼoboʼ. Ka túun tu yaʼalajtiʼob: ‹Kanáanteʼex u joonajiloʼob le templooʼ. Maʼ a chaʼikeʼex u yokol mix máakiʼ›. Ka tsʼoʼokeʼ Jehoiadaeʼ tu tsʼáaj u corona Jehoás utiaʼal ka u beet u reyil tu luʼumil Judá. U kajnáaliloʼob Judaeʼ tu kʼaʼam awtoʼob: ‹¡Nojbeʼenkúuntaʼak le reyoʼ!›.

Ka tu yuʼubaj Atalía u juum u tʼaan le máakoʼoboʼ bin áalkabil teʼ templooʼ. Ka tu yilaj le túumben reyoʼ tu yaʼalaj: ‹Tsʼoʼok in traicionartaʼal›. U nuuktakiloʼob le máaxoʼob ku kananoʼoboʼ tu machoʼob le kʼasaʼan reinaoʼ ka tu bisoʼob u kíimsoʼob. Letiʼeʼ tu péeksaj u maasil u beetoʼob baʼaloʼob kʼaastak. Chéen baʼaleʼ, ¿baʼax kun úuchul beora tsʼoʼok u kíimilaʼ?

Jehoiadaeʼ tu yáantaj u kajnáaliloʼob Judá utiaʼal ka u beetoʼob junpʼéel promesa tiʼ Jéeoba. Letiʼobeʼ tu yaʼaloʼob tiʼ Jéeoba yaan u adorartikoʼob chéen letiʼ. Jehoiadaeʼ tu yaʼalajtiʼob ka u jutoʼob u templo Baal yéetel ka u xuʼulsoʼob le beetbil diosoʼoboʼ. Utiaʼal  ka páajchajak u kaʼa adorartaʼal Jéeoba teʼ templooʼ, tu tsʼáaj sacerdoteʼob yéetel levitaʼob utiaʼal ka meyajnajkoʼobiʼ. Tu tsʼáaj xan máakoʼob kanáantik le templooʼ utiaʼal maʼ yokol le máaxoʼob beetik baʼaloʼob kʼaastakoʼ. Ka tsʼoʼokeʼ Jehoiadá yéetel u nuuktakiloʼob le máaxoʼob ku kanáanoʼoboʼ tu bisoʼob Jehoás teʼ palacio utiaʼal ka kulak teʼ tronooʼ. U kajnáaliloʼob Judaeʼ jach kiʼimakchaj u yóoloʼob tumen jeʼel u páajtal u adorartikoʼob Jéeobaeʼ. Beoraaʼ minaʼan le kʼasaʼan reina Atalíaoʼ yéetel tsʼoʼok u xuʼulul u adorartaʼal Baal. A tuklikeʼ, ¿tu chʼaʼaj wa saajkil Jehoiadá? ¿Ka tsʼáaik wa cuenta tumen maʼ tu chʼaʼaj saajkileʼ tu yáantaj yaʼab máak?