Wiri Izebere adu ti ni rimori angia Ataraya, nangia gbegberẽ boro wakina nari. Ataraya angia dia gu bakindo nangia ga Yuda. Ho kumbari akpi ni, wiiri atona ka zogarago. Ono ho wiri Ataraya akpi ni, ri amoi tiri ni nakindo nga ga Yuda. Fuoho, ri amangi ome ka gbarasapa gene ngbatunga abakindo naabaha, ni imo ri ai gu boro ka rengbe kada ni abazogo kuba ri, zavura atitari a. Aboro dunduko naagunde beri.

Gu gbiamotumo nangia Yoyada na diako nangia Yoseba, aima inoho nga, gupai Ataraya aamangaha re angia gbegberẽpai. I amoi gayo raka ngbapai yo ka õka tita Ataraya ni wiri tooni gude rimoko angia Yoasa. I asonosi ko yekaru yo.

Ho Yoasa adu ni na garãko saba, Yoyada adungura abarutiriivura na aRevi dunduko na ki gumba gupai fuyo nga: ‘Oni banda angbadimo ga Mbori bambu, ka boro sa rimingo ko yo ya.’ Fuoho, Yoyada amoi Yoasa ni bakindo Yuda na ki moi kpakpari bakindo riko yo. Aboro Yuda kini tangbayo nga: ‘Bakindo raki araka ni gbagaha!’

Nakindo Ataraya agi woro fugo aboro i nitangbayo na ri ki oro ku Yekaru yo. Ho ri abi gi vovo bakindo ni re, ri apoi kuari nga: “Pa taburo du! Pa taburo du!” Abarutiriivura azi gi gbegberẽ nakindo re ki kusi ri ku zagiyo na ki imi ri. Ono ginipai tigaha naadu tipa gu gbegberẽ maapai ri adu na ni kurii aboro ringara?

Yoyada aundo aboro ringara i mangi mozunga na Yekova, nga gu i akidohe rogoho nga i nikaa iriso kina Yekova sa. Yoyada aya fu aboro i kuadi gu Yekaru nga ga Bara kusande na ki kuadi sese akpiahe futufutu. Ko asia aboromotumo na aRevi i naamangasunge yekaru yo tipa gupai nga wa ka aboro rengbe ka irisombori yo berewe. Ko asia aboro i naabanda ngbadimo yekaru tipa gupai nga ka birikobiriko boro ya rimingo koyo ya. Fuoho, Yoyada na abarutiriivura adi Yoasa ki ndu na ko ku rogo gu kporo nga ga bakindo na ki moi ko auru mbatabakindo. Aboro Yuda adu na bakere ngbarago. Ni yangaraha tie, i adu na rengba ka iriso Yekova na ki gbia ranirii be gu gbegberẽ nakindo nangia Ataraya gbiati gu ziree irisombori nangia ga Bara. Mo nabi wai gu wingbaduse nangia ga Yoyada aundo dungu aboro?