Marauton an mga tawo sa siyudad nin Nineve sa Asiria. Sinugo ni Jehova an propetang si Jonas na magduman tanganing patanidan sinda para magbarago na. Pero nagdulag si Jonas pasiring sa ibong na direksiyon. Nagsakay siya sa barkong paduman sa Tarsis.

Kan an barko nasa tahaw na kan dagat, nagkaigwa nin makusog na bagyo, kaya nagkatarakot an mga paralayag. Namibi sinda sa mga diyos ninda asin naghapot: ‘Ta’no ta nangyayari ini?’ Nagtuga man giraray sainda si Jonas: ‘Ako an dapat basulon. Nagdulag ako sa ipinapagibo sako ni Jehova. Ihulog nindo ako sa dagat para magpundo na an bagyo.’ Habo kan mga paralayag na ihulog si Jonas, pero nagpumirit siya. Kan ihinulog ninda siya sa dagat, nagpundo an bagyo.

Paghuna ni Jonas, magagadan na siya. Kan nagparairarom na siya sa dagat, namibi siya ki Jehova. Dangan nagpadara si Jehova nin dakulaon na sira. Hinalon kaiyan si Jonas, pero dai siya nagadan. Sa laog kan tulak kan sira, namibi si Jonas: ‘Pangako po, pirmi taka nang susunudon.’ Tulong aldaw na iningatan ni Jehova si Jonas sa laog kan sira tapos pinangyari ni Jehova na iluwa siya kaini sa marang daga.

Baga man ilinigtas ni Jehova si Jonas, nangangahulugan daw ini na dai na siya kaipuhan magduman sa Nineve? Dai. Pinapaduman giraray siya ni Jehova. Sa pagkakataon na ini, nagsunod si Jonas,  tapos tinaraman niya an maraot na mga tawong idto: ‘Kuwarentang aldaw na sana, paparaon na an Nineve.’ Pero may dai inaasahan na nangyari—nagdangog an mga taga Nineve asin nagbarago. Sinabi kan hadi kan Nineve sa mga sakop kaini: ‘Mag-apod kamo sa Diyos, asin magsulsol. ’Baad lamang dai niya kita paraon.’ Kan mahiling ni Jehova na nagsulsol sinda, dai niya pinara an Nineve.

Angguton * si Jonas ta dai napara an siyudad. Isip-isipa ini: Nagin mapasensiya asin mahihirakon si Jehova ki Jonas, pero dai si Jonas nagin mahihirakon sa mga taga Nineve. Imbes, nagtukaw siya sa limpoy nin sarong tinanom na upo na nasa luwas kan siyudad asin nagmurusdot. Dangan nagadan an upo. Angguton si Jonas. Kaya sinabihan siya ni Jehova: ‘Mas mahalaga pa saimo an tinanom na ini kisa sa mga taga Nineve. Nahirak ako sainda kaya nakaligtas sinda.’ Ano an buot sabihon kaini? Mas importante an mga tawo sa Nineve kisa sa ano man na tinanom.