Bôte ya Ninive, tisone ya Assyrie, be mbe mbia be bôt. Yéhôva a nga jô nkuli mejô Jonas na, a ke kate bôte ya Ninive na be tyendé. Ve Jonas a nga nyoñ zene fe. A nga bete sitima a mbe a kele’e Tarsis.

Nné ane be nga téé dulu, nde beta ôkôs a nga vuñ; bôt ve zu ko woñ. Ane bôte be mbe sitima be nga taté na ba ye’elane bezambe bap be sili’i be na: ‘Amu jé bia tôbane nju’u wu?’ Nde Jonas a nga jô be na: ‘Ma me ne ajô. Ma tup ésaé Yéhôva a nga jô me na me bo. Nge mi wua me mañ été, ôkôs wo ye tebe.’ Be nji kômbô de bo, ve Jonas a nga ba’alane be na be bo de. Nné ane be nga wua nye ôsôé, ôkôs ô nga tebe.

Jonas a mbe a buni’i na a zu wu. Nté ôse a mbe a nyoñe mendim si, nde fe a mbe a ye’elane Yéhôva nalé. Ane Yéhôva a nga lôme beta kos. Nde kos é nga mine Jonas, ve teke wôé nye. Ane Jonas a nga ye’elane Yéhôva abume kos été, a jô’ô na: ‘Ma ka’ale wo na, ataté éyoñe ji, ma ye bo wo mewôk éyoñ ése.’ Ane Yéhôva a nga ba’ale Jonas abume kos été melu melal, mvuse ya valé, kos é nga yô nye kindik.

Mbôle Yéhôva a nga nyii Jonas, ye nalé a mbe a tina’ane na Jonas a nji be a bili na a beta ke Ninive? Momo. Yéhôva a nga  ba’alane nye na a ke wôé. Jonas a nga bo Yéhôva mewôk éyoñ éte. A nga ke Ninive, a kate bôte ya wôé na: ‘Ninive a ye tyamban mvuse melu mewôm menyin.’ Étua jam ve zu kui: bôte ya Ninive be nga vô’ôlô mejô mé, ane be nga tyendé. Njô bôte ya Ninive a nga jô jô bôte na: ‘Ye’elané Zambe, a kôñelané minlem. Za a yem, éko éziñ a ye bo te wôé bia.’ Éyoñe Yéhôva a nga yene na bôte ya Ninive be nga jôban a nlem ôse, a nji beta wôé be.

Ane Jonas a nga wô’ô jam ete ôlun. Tame simesan: Yéhôva a nga liti Jonas fulu ôjibi a mvam; ve Jonas ki a bene mvamane bôte ya Ninive. Ane Jonas a nga kôlô Ninive, a ke tabe mon élé si. Ve éyoñ élé éte é nga kôt, nde Jonas a nga wô’ô ôlun. Ane Yéhôva a nga jô nye na: ‘Me lô na wo nyoñ élé ji ngap a dañe abime wo nyoñe bôte ya Ninive ngap. Me nga mvamane be a nyii be.’ Sikôlô mbé Yéhôva a nga ve Jonas? Bôte ya Ninive be mbe mfi abui a lôte élé ése.