Andũ ala mekalaa ndũanĩ ya Nineva, ĩla yaĩ nthĩ ya Asuli maĩ athũku mũno. Kwoou Yeova eeie mwathani weetawa Yona athi Nineva akamatavye kana maĩle kũalyũla mwĩkalĩle woo. Ĩndĩ vandũ va Yona kũthi vala Yeova wamũtavĩtye athi, aendie kũndũ kũngĩ. Alikile meli nĩ kana athi Talisisi.

Me ũkanganĩ maendete, nĩkweethĩiwe na kĩuutani kĩnene, na ũu watuma atwai ma meli ĩsu matelema mũno. Atwai asu nĩmavoyie ngai syoo mayasya atĩĩ: ‘Nĩkĩ ũndũ ũũ ũũtũkwata?’ Ĩtina Yona ameie atĩĩ: ‘Ninyie nĩtumĩte ũndũ ũũ ũmũkwata. Nĩkĩĩe Talisisi nũndũ ndikwenda kũtethya wĩa ũla Yeova ũnengete. Mbĩkyei ũkanganĩ, na kĩuutani nĩkĩũthela.’ Atwai asu mayendaa kũmwĩkya Yona ũkanganĩ, ĩndĩ nĩwamathingʼĩĩisye meke ũu. Na yĩla mamwĩkisye, kĩuutani nĩkyathelile.

Yona oonaa ta ũkũkwʼa. Yĩla wambĩĩie kũlika nthĩnĩ ũkanganĩ nĩwambĩĩe kũmũvoya Yeova. Na ĩndĩ Yeova atũma ĩkũyũ ĩnene. Ĩkũyũ yĩu nĩyamũmelilye Yona ĩndĩ yĩyaamũaa. Yona e ĩkũyũnĩ nthĩnĩ nĩwamũvoyie Yeova asya: ‘Nĩngũkwatha kana ngakwĩwʼaa mavinda onthe.’ Yeova nĩwamũsũvĩie Yona e nthĩnĩ wa ĩkũyũ yĩu kwa ĩvinda ya mĩthenya ĩtatũ na ĩndĩ atuma ĩkũyũ yĩu yĩmũtavĩka ũtee wa ũkanga.

Nũndũ Yeova nĩwamũsũvĩie Yona, ũu woonanasya kana yu Yona ndaaĩle kũthi Nineva? Aiie. Vandũ va ũu, Yeova asyokie amwĩa  Yona athi Nineva. Ĩvindanĩ yĩu Yona nĩweekie kĩla Yeova wamũtavisye. Avika Nineva eeie andũ asu athũku atĩĩ: ‘Ĩtina wa mĩthenya 40, Nineva ĩkaanangwa.’ Ĩndĩ ũndũ ũtataĩĩwe nĩweethĩiwe, andũ ma Nineva nĩmeethukĩĩisye na maalyũla mwĩkalĩle woo. Mũsumbĩ wa Nineva eeie andũ atĩĩ: ‘Mwĩkaĩlei Ngai na mũyĩlila. Ũu nũtonya kũtuma atatwananga.’ Yĩla Yeova woonie andũ meelila, ndaananga Nineva.

Yona nĩwathatie mũno yĩla Yeova waleile kwananga ndũa ĩsu. Kwasũanĩa ũndũ ũsu: Aĩ Yeova nĩwamũmĩĩisye Yona na amwĩwʼĩa tei, ĩndĩ Yona ndeewʼĩaa andũ ma Nineva tei. Vandũ va ũu, Yona aendie nza wa ndũa ĩsu na ekala ungu wa wũngũ athatĩte mũno. Ĩndĩ ĩtina wa kavinda wũngũ ũsu nĩwoomie na Yona eewʼa woo mũno. Na ĩndĩ Yeova amwĩa: ‘Aĩ wendete wũngũ ũsu mbee wa ũndũ wendete andũ ma Nineva. Nĩnĩnoonisye andũ asu tei na kwoou naema kũmananga.’ Yeova endaa kũmanyĩsya Yona ũndũ wĩva? Endaa aelewe kana andũ ma Nineva maĩ vata mũno mbee wa wũngũ.