Itũũra-inĩ rĩa Nineve rĩrĩa rĩarĩ bũrũri-inĩ wa Aashuri, nĩ kwarĩ na andũ aganu mũno. Jehova eerire mũnabii Jona athiĩ Nineve akere andũ a kuo macenjie mĩthiĩre yao. No Jona orire agĩthiĩ kũndũ kũngĩ. Aahaicire meri ya gũthiĩ Tarishishi.

Rĩrĩa meri yarĩ iria-inĩ, nĩ kwagĩire na kĩhuhũkanio kĩnene na andũ arĩa maarĩ meri-inĩ ĩyo makĩmaka mũno. Maahoire ngai ciao makĩũragia ũũ: ‘Nĩ kĩĩ kĩrathiĩ na mbere?’ Thutha ũcio, Jona aameerire ũũ: ‘Nĩ niĩ ndĩratũma. Nĩ kũũra ndĩrora nĩguo ndigeke ũrĩa Jehova anjĩrĩte. Njikiai iria-inĩ na kĩhuhũkanio nĩ gĩgũthira.’ No andũ acio matiendaga gũikia Jona iria-inĩ, ĩndĩ nĩ aamatindĩkĩrĩirie mamũikie. Rĩrĩa maamũikirie, kĩhuhũkanio no gũthira gĩathirire.

Jona onaga ta egũkua, no o ũrĩa aathiaga akĩrikagĩra nĩ aahoire Jehova. Thutha ũcio Jehova nĩ aatũmire thamaki nene ĩmũmerie, no ndaakuire. Jona aahoire ũũ arĩ thĩinĩ wa nda ya thamaki ĩyo: ‘Nĩ ndĩgwathĩkagĩra hĩndĩ ciothe.’ Jehova nĩ aagitĩire Jona arĩ nda ya thamaki ĩyo kwa ihinda rĩa thikũ ithatũ, na agĩcoka agĩtũma ĩthiĩ ĩmũtahĩke hũgũrũrũ-inĩ cia iria.

Tondũ Jehova nĩ aahonoketie Jona-rĩ, hihi ũguo nĩ kuuga atĩ ndangĩathire Nineve? Aca. Jehova nĩ eerire Jona o rĩngĩ athiĩ Nineve. Ihinda-inĩ rĩu Jona nĩ aathĩkire. Aathiire kũu na akĩra  andũ acio aganu ũũ: ‘Thutha wa matukũ 40, Nineve nĩ ĩkwanangwo.’ No nĩ gwekĩkire ũndũ ũteerĩgĩrĩirũo o hĩndĩ ĩyo tondũ andũ a Nineve nĩ maamũthikĩrĩirie na magĩcenjia mĩthiĩre yao. Mũthamaki wa Nineve eerire andũ ake ũũ: ‘Kaĩrai Ngai na mwĩrire. Ahota kwaga gũtũniina.’ Na rĩrĩa Jehova onire atĩ andũ acio nĩ meerirĩte, ndamaninire.

Jona nĩ aarakarire mũno nĩ ũndũ wa itũũra rĩu kwaga kũniinwo. Ta wĩcirie ũndũ ũyũ: Jehova aarĩ na ũkirĩrĩria na tha nyingĩ kwerekera Jona, ĩndĩ Jona ndaarĩ na tha kwerekera andũ a Nineve. Ithenya rĩa ũguo, aathiire nja ya itũũra rĩu agĩikara thĩ kĩĩruru-inĩ kĩa rũũngũ arakarĩte. Mũmera ũcio nĩ womire na Jona akĩrakara makĩria. Nĩ ũndũ ũcio Jehova aamwĩrire: ‘Nĩ ũreciria mũmera ũcio mũno gũkĩra ũrĩa ũreciria andũ a Nineve. Nĩ ndĩmaiguĩrĩire tha na makahonoka.’ Eendaga kũmũruta ũndũ ũrĩkũ? Andũ a Nineve maarĩ a bata mũno gũkĩra mũmera o wothe.