Ipan Asiria onkatka se ueyikalpan itoka katka Nínive, akin ompa chantiyaj melak xkuakualtin katkaj. Jehová okijli iteotlajtokauj Jonás mauiya Nínive niman makimijliti ika nonekiya makipatlakan tlen kichiuayaj. San ika, Jonás oksekan ocholoj. Otlejkok ipan se barco tlen yaskia Tarsis.

Ijkuak barco onkatka ipan mar, opeuj chikauak ajakakiyaui niman marineros melak onomojtijkej. Okinchiuilijkej teoyotl intajtsitsinuan niman onotlajtoltijkej: “¿Tleka ijkon topan nochiujtok?”. Sakin, Jonás okimijli: “Yejuin nochiujtok nopampa. Nejua nicholojtika, xnikchiujtika tlen Jehová onechijli. Xnechonatlajkalikan niman ajakakiyaujtli noteltis”. Marineros xkinekiyaj kontlajkaliskej Jonás ipan mar, san ika, yejua okimijli makichiuakan. Ijkuak okontlajkalkej, ajakakiyaujtli onotelti.

Jonás okinemili ika mikiskia. Ijkuak polaktiaya ijtik mar, okichiuili teoyotl Jehová. Kuakon Jehová okichiuj ika se ueyi michin makitolo, san ika, xokimikti. Ijkuak nemiya ijtik michin, Jonás okichiuj teoyotl niman okijto: “Nimitsijlia ika nochipa nimitstlakamatis”. Jehová okitlajpix Jonás yeyi tonajli kech ouejkauj ijtik michin, sakin okichiuj ika michin makisotla ipan uajki tlajli.

 Pampa Jehová okimakixti Jonás, ¿kijtosnekiya ika xok nonekiya mauiya Nínive? Ka. Jehová oksejpa okontitlan. Aman Jonás kema otetlakamat. Oyaj okimijlito tlaltikpakchanejkej xkuakualtin: “Ipan 40 tonajli, Nínive popoliuis”. Kuakon opanok itlaj tlen xnochiaya, ninivitas okikakej niman onoyolkuepkej. Tekiuaj ipan Nínive okijli ikalpan: “Xnotsakan toTajtsin niman xmoyolkuepakan. Kanaj ijkon xtechpopolos”. Ijkuak Jehová okitak ika yonoyolkuepkaj, xokipopolo Nínive.

Jonás okualan ijkuak okitak ika ueyikalpan xokipopolojkej. Xkonemili: Jehová okijyoui Jonás niman okikneli, san ika, Jonás xokimikneli ninivitas. Kuakon okis itech ueyikalpan, onotlali itsintlan se ayojkijli niman onotlauelkixti. San ika, xiujtli ouak niman Jonás melak okualan. Kuakon Jehová okijli: “Timotekipachoua ipampa yejuin ayojkijli, san ika, xtimotekipachoua ipampa ninivitas. Nejua onikimikneli niman yejuamej omakiskej”. ¿Tlenon kinekiya toTajtsin kimachtis? Ika ninivitas melak ueyi kijtosnekiyaj xijkon ken se xiujtli.