Abantu b’omu rurembo Nineeve ey’omuri Asiria bakaba bari babi. Yehova akagambira nabi we Yona kuza Nineeve kurabura abantu ngu bashemereire kuhindura aha mitwarize yaabo. Kwonka Yona akahunga yaatoora omuhanda ogundi. Akaza omu meeri eyaabaire neeza Tarushiishi yaagyenda.

Emeeri ku yaabaire ekiri aha nyanja, hakaija omuyaga mwingi, abaabaire bari omu meeri bakatiina munonga. Bakashaba baaruhanga baabo nibagira bati: ‘Ahabw’enki eki nikibaho?’ Bwanyima, Yona akabagira ati: ‘Niinye nyine orubanja. Ndiyo nimpunga omurimo ogu Yehova angambiire kukora. Munnagye omu nyanja, obwo nibwo enyanja eraatuuze.’ Abaabaire bari omu meeri bakaba batarikwenda kunaga Yona omu nyanja, kwonka akabagyemesereza. Ku baamunagire omu nyanja, enyanja yaatuuza.

Yona akaba naateekateeka ngu naaza kufa. Ku yaagumire naatobera omu nyanja, yaashaba Yehova. Yehova akoohereza eky’enyanja kihango. Kikamira Yona, kwonka tikiramwitsire. Yona ku yaabaire ari omunda y’eky’enyanja, akashaba ati: ‘Ni ndagaanisa kuguma ninkworobera obutoosha.’ Yehova akarinda Yona ari omunda y’eky’enyanja kumara ebiro bishatu kandi bwanyima akaragiira eky’enyanja ekyo kutanaka Yona aha nkungu.

Mbwenu n’obu Yehova araabe yaacungwire Yona, eki kiba nikimanyisa ngu tikirikumwetengyesa kuza Nineeve? Ngaaha. Yehova akagaruka yaagambira Yona kuza Nineeve. Aha murundi ogu, Yona akoorobera  Yehova. Akazayo kandi yaagambira abantu abo ababi ati: ‘Omu biro 40, Nineeve neija kucwekyerezibwa.’ Kwonka haine ekyabaireho eki yaabaire atarikuteekateeka. Aba Nineeve baakahurikiza kandi bahindura aha mitwarize yaabo. Omugabe wa Nineeve akagambira abantu be ati: ‘Mutakire Ruhanga, kandi mweteise. Obundi tarikwija kutuhwerekyereza.’ Yehova ku yaareebire ngu abantu bayeteisa, taracwekyereize Nineeve.

Yona akagira ekiniga kingi ngu orurembo tiruracwekyerezibwe. Kiteekateekyeho: Yehova akagumisiririza Yona kandi yaamugirira embabazi, kwonka Yona taragiriire abantu ba Nineeve embabazi. Kureka, akashutama aheeru y’orurembo ahansi y’omwongo. Bwanyima omwongo ogwo gukooma, kandi Yona akaagira ekiniga kingi. N’ahabw’ekyo Yehova akamugira ati: ‘Noosaasibwa omwongo ogu okukira abantu ba Nineeve. Nkabagirira embabazi, kandi tinaabacwekyereza.’ Akaba naamwegyesa ki? Abantu ba Nineeve bakaba nibakirira kimwe omwongo ogwo.