54. PRIČA
O Jehova hine strpljivo e Jonaja
O manuša andi asirsko diz Niniva hine but lošna. O Jehova phendža peklje prorokose, e Jonase, te džal ki Niniva hem te phenel ljendže te na čeren više lošna buča. Ama, o Jona našlja hem dželo ko aver drumo. Ukljilo ko jekh brod kova dželo ko Tarsis hem našlja.
Dži o brod hine ko more, kotar jekh puti počmindža but bari oluja hem o mornarija but darandilje. On molindže pe peklje devljendže hem pučlje pe: „Sose ovela amendže akava?“ Ko krajo, o Jona phendža ljendže: „Me hijum krivo. Me našava kotar odova so phendža maje o Jehova te čerav. Forden man ko more hem i oluja ka ačhol.“ O mornarija na manglje te forden e Jona ko more, ama ov rodindža ljendar odova. Ked fordindže lje ko more, i oluja ačhilji.
O Jona mislindža so ka merel. Dži batindža sa pohor hem pohor ko more, ov molindža pe e Jehovase. Tegani, o Jehova bičhaldža jekhe bare mačhe kova nakhavdža e Jona, ama na mudardža lje. Kotar e mačheso vodži, o Jona molindža pe: „Obećinava so ka čerav sa so ka phene maje.“ O Jehova čerdža o Jona te ačhol dživdo trin dive ko e mačheso vodži hem palo odova čerdža o mačho te fordel lje ki phuv.
Da li odova so o Jehova spasindža e Jona značindža so ov na valjandža paljem te džal ki Niniva? Na. O Jehova paljem phendža e Jonase te džal uduri. Akava puti, o Jona šundža lje. Ov dželo ki Niniva hem e lošno manušendže phendža: „Aso 40 dive, i Niniva ka ovel uništimi.“ Ama, tegani ulo diso so o Jona ni na mislindža so ka ovel. O manuša andi Niniva šundže lje hem menindže pe. O kralj andi Niniva phendža peklje narodose: „Roden e Devlje, hem kajinen tumen. Šaj na ka uništini amen.“ Ked o Jehova dikhlja so o manuša kajindže pe, ov na uništindža i Niniva.
O Jona but holjandža so o Jehova na uništindža i diz. Zamislin, o Jehova hine strpljivo hem milostivo premalo Jona, a ov na hine milostivo premalo manuša so živindže ki Niniva. Umesto odova, ov holjandža. Dželo andi diz hem bešlja tali jekh senka kotar jekh dudum. Ama, o dudum šučilo hem o Jona but holjandža. Odoljese, o Jehova phendža ljese: „Tuče tano poviše žao aso jekh dudum, nego aso manuša andi Niniva. Me oprostindžum ljendže hem odoljese tane on pana dživde.“ So manglja o Jehova odoljeja te sikavi e Jona? O manuša andi Niniva hine pobuter važna ando jekh dudum.
„O Jehova na harini te čerel odova so phendža, sar so disave mislinena so harini, nego strpljivo tano tumencar sose na mangela nijekh te merel, nego sare te kajinen pe“ (2. Petrova 3:9)
